साताको सुरुवातमै अष्ट्रेलियन डलर मजबुत स्थिति कायम गर्दै उच्च मूल्यमा पुगेको छ। यो वृद्धि मुख्य रूपमा अमेरिकी–चीन व्यापार वार्ताको सकारात्मक परिणामका कारण भएको हो। विशेषज्ञहरूले आगामी १२ महिनामा अष्ट्रेलियन डलर अझ बढ्ने संकेत देखाएको बताएका छन्।
अघिल्लो हप्तासम्म अष्ट्रेलियन डलर अमेरिकी ६५ सेन्ट वरिपरि स्थिर थियो। तर, मलेसियामा भएको अमेरिकी खजाना सचिव स्कट बिसेन्ट र चिनियाँ अधिकारीहरूको बैठकपछि डलरमा केही उछाल आएको छ। विश्वका दुई ठूला अर्थतन्त्रबीच व्यापार तनाव बढ्ने डर भइरहे पनि वार्ताकारहरूले सकारात्मक परिणामको संकेत दिएका छन्।
चीनका शीर्ष व्यापार वार्ताकार ली चेंगगाङले पत्रकारहरूलाई जानकारी दिँदै भने कि दुई देशबीच “प्रारम्भिक सहमति”मा पुगिएको छ।
यस सहमतिमा केही महत्वपूर्ण पहलहरू पनि समावेश छन्। प्रारम्भिक समझदारी अनुसार, फेन्टानिल उत्पादनमा प्रयोग हुने पूर्वसाधक रासायनिक पदार्थ अमेरिका प्रवेश नगर्ने, चिनियाँ पक्षले ठूला मात्रामा सोयाबिन र अन्य कृषि उत्पादनको खरिद गर्ने, साथै दुर्लभ धातु निर्यात नियन्त्रण स्थगित गर्ने योजना तय भएको छ। यी कदमहरूले दुई अर्थतन्त्रबीच विश्वास बढाउने र व्यापार तनाव कम गर्ने अपेक्षा गरिएको छ।
यी घटनाक्रमले अष्ट्रेलियन डलरलाई बढावा दिएको छ र यसलाई आज दिउँसो करिब ६५.४ अमेरिकी सेन्टसम्म पुर्याएको छ। यद्यपि, यो मूल्य यस वर्षको उच्चतम स्तर ६६ सेन्ट भन्दा अलिक कम हो, तर विशेषज्ञहरूका अनुसार यो बढ्ने प्रवृत्ति जारी रहनेछ।
अक्सफोर्ड इकॉनमिक्सका प्रमुख अर्थशास्त्री ह्यारी मर्फी क्रुजले एक रिपोर्टमा भनेका छन् कि अष्ट्रेलियन डलर यस वर्षको अन्त्यसम्म अमेरिकी डलरको तुलना गर्दै ६६ सेन्टमा पुग्नेछ र २०२६ सम्म ०.६८ अमेरिकी डलरको मूल्यको अनुमान गरिएको छ। उनले बताए अनुसार अमेरिकी अर्थतन्त्रले आफैँ सृजना गरेको केही समस्याहरू – जस्तै उच्च ट्यारिफ, सरकारी शटडाउन र ठूलो मात्रामा निकासी (डिपोर्टेशन) – अमेरिकी डलरलाई कमजोर बनाइरहेका छन् र यसले लगानीकर्ताहरूलाई अन्य विकल्प खोज्न बाध्य बनाइरहेको छ।
क्रुजले थपे, “कमोडिटी मूल्यमा कमजोरी र चीनको अर्थतन्त्रको सुस्त वृद्धि अष्ट्रेलियन डलरको वृद्धिलाई केही मात्रामा दबाउनेछ, तर यसले डलरको appreciation (मूल्य वृद्धिलाई) पूर्णरूपमा रोक्न सक्दैन।”
विशेषज्ञहरू भन्छन् कि हालको सकारात्मक व्यापार संकेत र अष्ट्रेलियन डलरको स्थिर वृद्धि लगानीकर्ताहरूका लागि राम्रो खबर हो। यसले अन्तर्राष्ट्रिय बजारमा अष्ट्रेलियाको आर्थिक स्थिति सुदृढ हुने सम्भावना बढाउँछ।
