मेलबर्न – गत वर्ष डिसेम्बर ६ मा मेलबर्नस्थित अडास इजरायल सिनागोगमा भएको आगजनी प्रकरणमा २१ वर्षीय युवकलाई प्रहरीले पक्राउ गरी मुद्दा दायर गरेको छ।
वेरिबी निवासी युवकलाई प्रहरीले आगजनी, जीवनलाई खतरा पुर्याउने कार्य र सवारीसाधन चोरी आरोपमा पक्राउ गरेको हो। प्रहरीको आरोप अनुसार उनी तीनजनामध्ये एक हुन् जसले Ripponleaस्थित सिनागोगमा आगजनी गरी ठूलो क्षति पुर्याएका थिए।
संयुक्त काउण्टर टेररिज्म टिम (JCTT) को संयोजनमा July 30 का दिन भएको मेलबर्नका विभिन्न स्थानमा गरिएका सात छापामार कारबाहीका क्रममा वेरिबीस्थित घरबाट उनलाई पक्राउ गरिएको हो। सो क्रममा प्वाइन्ट कुक, टुराक, एयरपोर्ट वेस्ट, हाडफिल्ड, वेरिबी, वेयर भ्यूज र कोबर्गका घरबाट विभिन्न इलेक्ट्रोनिक उपकरणहरू समेत बरामद गरिएको छ।
प्रहरीका अनुसार थप पक्राउ र मुद्दा दायर हुने सम्भावना छ। पक्राउ परेका युवकलाई आज मेलबर्न मजिस्ट्रेट्स कोर्टमा पेश गरिनेछ। भिक्टोरियाको कानुनअनुसार आगजनीको दोषी ठहर भएमा अधिकतम १५ वर्षको जेल सजाय हुन्छ भने सवारी चोरी र जीवनलाई खतरा पुर्याउने अपराधमा १० वर्षसम्म कैद सजायको प्रावधान छ।
यसअघि गत जुलाई १६ मा प्रहरीले सोही घटनामा प्रयोग गरिएको कार चोरी गरेको आरोपमा अर्का एक युवकलाई मुद्दा दायर गरेको थियो।
अष्ट्रेलियन फेडेरल पुलिस (AFP) का अनुसार घटनामा विदेशी आपराधिक नेटवर्कको संलग्नता रहेको आशंका छ। “हाम्रो अनुसन्धान अष्ट्रेलियासम्म सीमित छैन, हामी विदेशी आपराधिक समूहहरूसँगको सम्बन्ध पनि हेर्दैछौं,” एएफपी उप–आयुक्त क्रिसी ब्यारेटले बताइन्।
