सन् २०२५ का लागि सुरक्षित यात्रा गन्तव्यहरूको सूचीमा अष्ट्रेलिया दोस्रो स्थानमा परेको छ। ‘बर्कशायर ह्याथवे ट्राभल प्रोटेक्सन’ (BHTP) ले सार्वजनिक गरेको प्रतिवेदनमा आइसल्यान्डलाई पहिलो र क्यानाडालाई तेस्रो स्थानमा राखिएको छ।
यो प्रतिवेदन तयार पार्दा विभिन्न देशहरूको समग्र सुरक्षा अवस्थालाई आधार मानिएको छ जस्तै कम अपराध दर भएका देशहरू, आतंकवादको न्यून जोखिम, स्वास्थ्य सेवाको उपलब्धता, र रोग तथा महामारीको नियन्त्रणलाई प्राथमिकता दिइएको थियो। साथै, यात्रुहरूका लागि समावेशी वातावरणको सुनिश्चितता, विशेषगरी रंगभेद र LGBTQIA+ समुदायप्रतिको सुरक्षाको अवस्था, मूल्याङ्कनको मुख्य मापदण्डमा समावेश गरिएका थिए।
सूची बनाउने क्रममा ग्लोबल पीस इन्डेक्स, नुम्बोको तथ्याङ्क र प्रत्येक देशका प्रमुख शहरहरुको अवस्था पनि अध्ययन गरिएको जनाइएको छ।
आइसल्यान्डले आफ्नो शान्त वातावरण र अपराधमुक्त समाजका कारण पहिलो स्थान हासिल गरेको छ। अष्ट्रेलिया भने प्राकृतिक विविधता, उच्चस्तरीय स्वास्थ्य सेवा, र समग्र सुरक्षाका कारण दोस्रो स्थानमा परेको हो। क्यानाडा भने सांस्कृतिक सहिष्णुताका साथै सुरक्षित वातावरणका कारण तेस्रो स्थानमा पर्यो।
यो प्रतिवेदनअनुसार स्विट्जरल्याण्ड पाँचौँ र न्युजिल्यान्ड छैटौँ स्थानमा छन्। सुरक्षित गन्तव्यको सूचीले यात्रुहरूलाई सही गन्तव्य छनोट गर्न सहयोग गर्ने विश्वास गरिएको छ। साथै, यो प्रतिवेदनले विभिन्न देशहरूको सुरक्षात्मक प्रयासलाई थप प्रोत्साहन गर्ने अपेक्षा गरिएको छ।
