काठमाडौं । सञ्चारकर्मी प्रकाश सुवेदीले हालै प्राप्त गरेको ज्यान मार्ने धम्की अहिले चर्चाको विषय बनेको छ । उनलाई एक फोनकलमार्फत ज्यान लिने धम्की दिइएको हो, जसकारण सुवेदीले आफ्नो सुरक्षाको माग गर्दै प्रहरीसँग सम्पर्क गरेका छन् ।
फोनमा हिन्दी भाषामा बोल्ने एक युवकले सुवेदीलाई मार्न दुई करोडको सुपारी पाएको दाबी गरेको थियो । उक्त व्यक्तिले सुवेदीका छोरा र छोरीको अमेरिकाको ठेगाना समेत बताउँदा सुवेदी चिन्तित बनेका छन् ।
धम्की बारम्बार आएपछि उनले फोन रेकर्डहरू संकलन गरी प्रहरीको साइबर ब्युरो र अपराध अनुसन्धान शाखामा उजुरी दिएका छन् । अहिले प्रहरी यस घटना बारे अनुसन्धानमा जुटेको छ ।
यसबीचमा, सुवेदीले १२ गाउको टिमलाई यस घटनामा संलग्न भएको शंका गरेका छन् । आफ्नो कार्यक्रम ‘रजतपट’मा १२ गाउको आलोचना गर्दा उनीहरूले प्रतिकार गर्न धम्की दिएको हुन सक्ने सुवेदीले बताएका छन् ।
साथै, उनले अभिनेता विराज भट्टका छोरा समिर भट्टले बनेपामा धम्कीपूर्ण भाषा प्रयोग गरेको उल्लेख गरेका छन् । यद्यपि, सुवेदीले कुनै ठोस प्रमाणबिना आरोप लगाउन नचाहेको स्पष्ट पारेका छन् ।
