बलिउड अभिनेता आमिर खान पुनः फिल्म ‘गजिनी’को सिक्वेलमा चर्चा हुँदैछन्। यस महिनाको सुरुमा निर्माता अल्लु अरविन्द र मधु मन्टेनासँग आमिरले २००८ मा रिलिज भएको कल्ट ब्लकबस्टर ‘गजिनी २’ को सिक्वेलबारे छलफल गरेको समाचार आएको थियो। समाचारका अनुसार निर्माताहरूले आमिरलाई आइडिया सुनाएका थिए, तर आमिरले स्टोरीबोर्डको विकास गर्न सल्लाह दिएर छलफललाई अगाडि बढाएका थिए।
तर, पछिल्लो समयमा ‘गजिनी २’ का लागि नयाँ खबर आएको छ। तमिल फिल्म उद्योगका सुपरस्टार सूर्यालाई मुख्य भूमिकामा लिएर निर्माता अल्लु अरविन्दले तमिल भाषामा ‘गजिनी २’ निर्माण गर्ने योजना अघि सारेका छन्। पिंकभिल्लासँगको कुराकानीमा सूर्याले यस कुरालाई पुष्टि गर्दै भने, “लामो समयदेखि ‘गजिनी २’ को तयारीमा छौं। अल्लु अरविन्दले आइडिया ल्याएका थिए, र मैले यसको सम्भावना रहेको जवाफ दिएको छु। तयारी अघि बढिरहेको छ।”
यो खबरसँगै अब ‘गजिनी २’ हिन्दी र तमिल दुबै संस्करणमा निर्माण हुने योजना सार्वजनिक भएको छ। पिंकभिल्लाको रिपोर्ट अनुसार अल्लु अरविन्द र मधु मन्टेनाले हिन्दी र तमिल भाषामा फिल्मको छायांकन एकैसाथ गर्ने सोच बनाएका छन्। यसका लागि आमिर र सूर्याले आफ्नो उत्साह प्रकट गरेका छन्। तर, उनीहरू आफ्नो फिल्ममा रिमेकको ट्याग नलागोस् भन्ने चाहन्छन्।
निर्माताहरूले दुबै फिल्मलाई एकैसाथ रिलिज गर्दा नयाँपन नहट्ने र दर्शकलाई अद्वितीय अनुभव प्रदान गर्न सकिने सोचेर योजना अघि बढाएका छन्। स्रोतका अनुसार, अहिले फिल्मको स्क्रिप्ट अध्ययनमा ध्यान केन्द्रित छ, र छिट्टै यसबारे थप जानकारी आउने अपेक्षा गरिएको छ।
यो परियोजनासँगै, निर्माताहरूले हिट फ्रेन्चाइजी ‘दृश्यम्’को पनि यस्तै शैलीमा निर्माणको योजना बनाइरहेका छन्। उनीहरू बहुभाषी दर्शकलाई लक्षित गर्दै, फिल्मलाई एकैसाथ सुट गरी एउटै दिन ठूलो पर्दामा ल्याउन चाहन्छन्।
