अर्जेन्टिनाबाट सुरु भएको हान्टाभाइरस संक्रमणसँग जोडिएको MV Hondius क्रुज जहाज प्रकरणपछि अस्ट्रेलियाले आफ्ना नागरिकमाथि विशेष स्वास्थ्य निगरानी सुरु गरेको छ। संक्रमण फैलिने जोखिमलाई ध्यानमा राख्दै अस्ट्रेलियाली स्वास्थ्य निकायहरू उच्च सतर्कतामा रहेका छन्।
यो संक्रमण पहिलोपटक अर्जेन्टिनाको दक्षिणी क्षेत्र Ushuaia आसपासबाट सुरु भएको आशंका गरिएको छ। चराचुरुङ्गी अवलोकनका लागि पुगेका केही पर्यटक संक्रमित मुसाको फोहोर वा धुलोसँग सम्पर्कमा आएपछि संक्रमण फैलिएको प्रारम्भिक अनुसन्धानले देखाएको छ। त्यसपछि दक्षिण अमेरिकी यात्रा गरिरहेको MV Hondius क्रुज जहाजमा रहेका यात्रुहरूमा स्वास्थ्य समस्या देखिन थालेको थियो।
जहाजमा यात्रा गरेका केही यात्रुमा हान्टाभाइरस संक्रमण पुष्टि भइसकेको छ भने हालसम्म कम्तीमा तीन जनाको मृत्यु भएको छ। संक्रमणपछि जहाजलाई स्पेनको Canary Islands अन्तर्गत पर्ने Tenerife बन्दरगाहमा लगिएको थियो, जहाँबाट यात्रुहरूलाई विशेष सुरक्षा व्यवस्थासहित बाहिर निकालिएको थियो।
अस्ट्रेलियाबाट उक्त जहाजमा रहेका चार अस्ट्रेलियाली नागरिक, एक स्थायी बासिन्दा तथा एक न्यूजिल्याण्ड नागरिकलाई स्वदेश फर्काउने तयारी गरिएको छ। उनीहरूलाई अस्ट्रेलिया आइपुगेपछि सिड्नीस्थित NSW Biocontainment Centre मा राखेर स्वास्थ्य परीक्षण तथा निगरानी गरिने भएको छ। NSW Health ले यात्रुहरूलाई निरन्तर निगरानीमा राखिने र लक्षण देखिए तत्काल उपचार गरिने जनाएको छ।
अमेरिकी स्वास्थ्य अधिकारीहरूका अनुसार उद्धार गरिएका १७ अमेरिकी यात्रुमध्ये एक जनामा हान्टाभाइरस संक्रमण पुष्टि भएको छ, यद्यपि ती यात्रुमा हाल कुनै लक्षण देखिएको छैन। उनलाई अमेरिकाको Nebraska Biocontainment Unit मा राखिएको छ भने अन्य यात्रुहरूलाई क्वारेन्टिनमा राखेर निगरानी गरिँदैछ।
त्यस्तै, फ्रान्स फर्किने क्रममा एक फ्रेन्च यात्रुमा संक्रमणसँग मिल्ने लक्षण देखिएपछि विमानमै रहेका यात्रुहरूलाई आइसोलेसनमा राखिएको थियो। फ्रान्स सरकारले उनीहरूको परीक्षण प्रक्रिया अघि बढाएको जनाएको छ।
विश्व स्वास्थ्य संगठन (WHO) ले हाल सर्वसाधारणका लागि जोखिम कम रहेको जनाएको छ। WHO का अनुसार हान्टाभाइरस सामान्यतया संक्रमित मुसाको फोहोर, पिसाब वा धुलोसँगको सम्पर्कबाट फैलिने गर्छ। जहाजमा देखिएको Andes strain ले दुर्लभ अवस्थामा मानिसबाट मानिसमा पनि संक्रमण फैलाउन सक्ने जनाइएको छ।
अस्ट्रेलियाली स्वास्थ्य अधिकारीहरूले सर्वसाधारणलाई नआत्तिन आग्रह गर्दै स्थिति नियन्त्रणमा रहेको बताएका छन्। यद्यपि संक्रमणको सम्भावित जोखिमलाई ध्यानमा राख्दै अन्तर्राष्ट्रिय यात्रुहरूको स्वास्थ्य निगरानी अझ कडा बनाइएको छ।
