सिड्नी – अमेरिकी राष्ट्रपति डोनाल्ड ट्रम्पले हालै जारी गरेको नयाँ कार्यकारी आदेशमार्फत विश्वभरका दर्जनौँ मुलुकमाथि आयात टैरिफ बढाए पनि अष्ट्रेलिया त्यसबाट जोगिएको छ। अष्ट्रेलियाबाट अमेरिकामा जाने सामानहरूमा अहिलेसम्म जस्तै १० प्रतिशतको आधारभूत टैरिफ मात्र लागू हुने भएको छ।
अमेरिकी सरकारद्वारा वासिङ्टन डीसीस्थित अष्ट्रेलियाली दूतावासलाई पुष्टि गरिएको अनुसार, नयाँ सूचीमा नपरेका मुलुकहरूमा १० प्रतिशत टैरिफ कायम रहनेछ। अष्ट्रेलिया त्यही सूचिमा नपरेको हुँदा कुनै थप वृद्धि नभएको हो।
अष्ट्रेलियाको कुटनीतिक सफलता
व्यापार मन्त्री डन फेरेलका अनुसार, अमेरिकी प्रशासनभित्र अष्ट्रेलियामाथि टैरिफ बढाउने दबाब थियो तर राष्ट्रपति ट्रम्पले १० प्रतिशतमै कायम राख्ने निर्णय गरेका हुन्।
“यो अल्बानीज सरकार – विशेषगरी प्रधानमन्त्रीको कूल र संयमित कुटनीतिक शैलीको प्रमाण हो,” फेरेलले भने।
फेरेलले अष्ट्रेलियाले अमेरिकासँग व्यापारमा घाटा व्यहोरे पनि प्रतिशोधस्वरूप अमेरिकी सामानमा अतिरिक्त टैरिफ लगाउनु प्रतिकूल हुने टिप्पणी गरे। बरु १० प्रतिशतमै स्थिर रहनु अष्ट्रेलियाका लागि तुलनात्मक रूपमा ठूलो उपलब्धि भएको उनले बताए। यसले अष्ट्रेलियाली वाइन, बीफ, भेडा मासु, गहुँ जस्ता सामानहरू अमेरिकामा झन् प्रतिस्पर्धी हुने उनको भनाइ छ।
तर, उद्योग–विशेष टैरिफ भने यथावत् छ। अष्ट्रेलियाली इस्पात, एल्युमिनियम र कपरमाथि ट्रम्प प्रशासनले पहिले नै तोकेको ५० प्रतिशत टैरिफ जारी रहनेछ।
‘पूर्ण टैरिफ हटाउन प्रयास जारी’
फेरेलले अमेरिकी वाणिज्य सचिव हावर्ड लुटनिकलाई अष्ट्रेलिया भ्रमणका लागि आमन्त्रण गर्दै सबै टैरिफ हटाउने विषयलाई निरन्तर अघि बढाइरहने बताए।
“हामी स्वतन्त्र र निष्पक्ष व्यापारमा विश्वास गर्छौँ। मुक्त व्यापार सम्झौताको मर्मअनुसार अमेरिकाले अष्ट्रेलियाली उत्पादनमाथि सबै टैरिफ हटाउनुपर्छ भन्ने हाम्रो अडान कायम छ,” उनले स्पष्ट पारे।
अाउकस र व्यापार अलग
पत्रकारहरूले बहु-अर्ब डलरको AUKUS आणविक पनडुब्बी सम्झौता व्यापार वार्तासँग जोडिएको हो कि भन्ने प्रश्नमा फेरेलले स्पष्ट जवाफ दिएका छन् – “रक्षा सम्बन्ध र व्यापार छुट्टै विषय हुन्। राष्ट्रिय सुरक्षाभन्दा महत्वपूर्ण काम संघीय सरकारको अरु केही हुँदैन।”
ट्रम्पले आदेश दिएअनुसार अमेरिकी पेन्टागन अहिले बाइडेन युगमा भएको अाउकस सम्झौताको समीक्षा गरिरहेको छ।
अष्ट्रेलियाको आर्थिक प्रभाव न्यून
कमनवेल्थ बैंक अफ अष्ट्रेलियाले शुक्रबार जारी गरेको प्रतिवेदनअनुसार, ट्रम्पका टैरिफका कारण अष्ट्रेलियाको जीडीपी आगामी केही वर्षमा करिब ०.३ प्रतिशत मात्र घट्ने अनुमान गरिएको छ। किनभने अष्ट्रेलियाको कुल निर्यातको जम्मा ५ प्रतिशत मात्रै अमेरिका जाने गर्छ।
अन्य मुलुकहरूमाथि कडा प्रहार
ट्रम्पको नयाँ आदेशले विशेषगरी साना अर्थतन्त्रहरूलाई कठोर प्रहार गरेको छ।
सिरियामाथि ४१% टैरिफ
म्यानमार र लाओसमा ४०% टैरिफ
युरोपेली संघ (EU) : केही सामानमा ०%, अरुमा १५%
चीन : हाल ३०% कायम, तर प्रस्तावित १४५% दण्डात्मक टैरिफ अगस्ट मध्यसम्म स्थगित
अमेरिकी अर्थमन्त्री स्कट बेसन्टले चीनसँग “सम्झौताको आधार तयार भइसकेको छ तर अझै पूर्ण भएको छैन” बताएका छन्।
औषधि मूल्यमा पनि विवाद
ट्रम्पले अष्ट्रेलियाको Pharmaceutical Benefits Scheme (PBS) लाई आलोचना गर्दै अमेरिकी औषधि कम्पनीहरूसँग सस्तो मूल्यमा सम्झौता गर्ने प्रथालाई आपत्ति जनाएका छन्। तर अष्ट्रेलियाली सरकारले स्पष्ट रूपमा भनेको छ – “PBS वार्ताको विषय होइन।”
“हामी अष्ट्रेलियाली जनतालाई सस्तो औषधि उपलब्ध गराउने काममा निरन्तर केन्द्रित छौँ,” सरकारी प्रवक्ताले भने।
यसरी अष्ट्रेलिया अन्य मुलुकहरूभन्दा सुरक्षित रहन सफल भएको छ। फेरेलका अनुसार यो कुटनीतिक शैली र अमेरिकी प्रशासनसँगको संयमित वार्ताको परिणाम हो।
