प्रमुख कोष प्रबन्धक तथा Wilson Asset Management का अध्यक्ष ज्योफ विल्सनले लेबर सरकारले प्रस्ताव गरेको सुपर कर योजना अष्ट्रेलियाली जनतालाई “ग्यासलाइटिङ” गर्ने प्रयास भएको आरोप लगाएका छन्। सरकारले $३ मिलियनभन्दा माथिका सुपर खातामा दोब्बर कर र अप्राप्त पुँजी लाभमा कर लगाउने प्रस्ताव अघि सारेको छ। सरकारले यो करले केवल ८०,००० खातालाई मात्र असर गर्ने बताएको भए पनि, विल्सनले यसले करिब $४.२ ट्रिलियन बराबरको सुपरएनुएसन प्रणालीमा गहिरो असर पार्ने चेतावनी दिएका छन्।
विल्सनले करको असरले स्वयं-व्यवस्थापित सुपर फन्डहरू (SMSF) बाट पुँजी बाहिरिने, आवास बजारमा दबाव बढ्ने र स्टार्टअप तथा साना व्यवसायहरूमा लगानी कम हुने बताए।उहाँले नर्वे र बेलायतको उदाहरण दिँदै यस्तो करले अपेक्षा विपरीत राजस्व घटाउने र लगानीकर्ता भाग्ने चेतावनी पनि दिए। आर्थिक मोडेल अनुसार, प्रस्तावित करको दीर्घकालीन असर अष्ट्रेलियाली अर्थतन्त्रमा $९४.५ अर्ब नकारात्मक हुन सक्ने उनले दाबी गरे।
यसैबीच, Financial Services Council को नयाँ विश्लेषणले सरकारको कर योजनाले ५ लाखभन्दा बढी कार्यरत अष्ट्रेलियालीहरूलाई असर गर्ने देखाएको छ, जसमा धेरैजसो युवा छन्। हरित दलले सीमा घटाएर $२ मिलियनमा झार्न र मुद्रास्फीतिसँग जोड्न प्रस्ताव गरेको छ। Council का प्रमुख ब्लेक ब्रिग्सले सरकार र हरित दललाई विस्तृत परामर्शमा जान आग्रह गरेका छन्।
