नेपालमा देखा परेको Gen Z आन्दोलन ले उठाएका विषयवस्तुलाई सकारात्मक रूपमा मूल्यांकन गर्दै अष्ट्रेलियामा सक्रिय दुई प्रवासी संस्थाहरू— Overseas Nepali United Forum (ONUF) र Nepal Progressive Professionals Forum (NPPF)—बीच औपचारिक सहकार्यको सुरुआत भएको छ। यही सन्दर्भमा दुवै संस्थाले संयुक्त प्रारम्भिक अन्तरक्रिया कार्यक्रम आयोजना गर्दै आन्दोलनका मागहरू लोकतान्त्रिक र संस्थागत प्रक्रियामार्फत सम्बोधन हुनुपर्ने धारणा अघि सारेका छन्।
भेलामा सहभागी वक्ताहरूले नेपाल सरकारले पछिल्ला दिनमा जारी गरेका केही नीतिगत तथा प्रशासनिक निर्णयहरूलाई सकारात्मक संकेतका रूपमा लिँदै, ती निर्णयहरू Gen Z आन्दोलनले उठाएका सुशासन, पारदर्शिता र जवाफदेहिताका मागसँग सार्थक रूपमा जोडिनुपर्ने बताएका छन्। उनीहरूका अनुसार अहिलेको राजनीतिक परिवेश पुरानो अभ्यासभन्दा बाहिर निस्केर नयाँ सोच र नयाँ कार्यदिशा अवलम्बन गर्ने अवसरका रूपमा लिन सकिन्छ।
कार्यक्रममा NPPF अष्ट्रेलियाका अध्यक्ष दीपक पाण्डे र ONUF का अध्यक्ष अच्युत शर्मा थपलियाले सम्बोधन गर्दै प्रवासमा रहेका नेपालीहरू केवल प्रतिक्रियात्मक भूमिकामा सीमित नरही, विचार, नीति र दीर्घकालीन समाधानमा योगदान दिन सक्ने क्षमतामा रहेको उल्लेख गरे। उनीहरूले संस्थागत एकता, साझा दृष्टिकोण र निरन्तर संवादमार्फत प्रभावकारी भूमिका निर्वाह गर्न सकिनेमा जोड दिए।
छलफलमा सहभागी सामाजिक तथा बौद्धिक व्यक्तित्वहरूले नेपालको वर्तमान राजनीतिक अवस्थाबाट स्थायित्वको बाटो समावेशी, उत्तरदायी र प्रणालीमुखी शासन व्यवस्थाबाट मात्र सम्भव हुने धारणा व्यक्त गरे। व्यक्ति–केन्द्रित राजनीति र अस्थायी गठबन्धनले दीगो समाधान नदिने भन्दै, सबै वर्ग, समुदाय र पुस्तालाई समेट्ने संरचनात्मक सुधार अपरिहार्य रहेको निष्कर्ष निकालियो।
भेलामा दुई मुख्य कार्यदिशा स्पष्ट रूपमा अघि सारिएको थियो। पहिलो, राष्ट्रिय राजनीतिलाई व्यक्तिको प्रभावभन्दा माथि उठाएर संविधान, लोकतान्त्रिक मूल्य र संस्थागत प्रक्रियामा आधारित बनाइनुपर्ने। दोस्रो, समुदायिक तहमा नागरिक सहभागिता विस्तार गर्दै युवाहरू, पेशेवर वर्ग र नागरिक समाजलाई निर्णय प्रक्रियासँग जोडिन प्रेरित गर्नुपर्ने।
कार्यक्रमले ONUF र NPPF बीच सामाजिक सेवा, जनचेतना अभिवृद्धि, नीति संवाद र समुदाय–केन्द्रित कार्यक्रमहरूमा सहकार्यलाई औपचारिक रूप दिने निर्णयसमेत गरेको छ। यसका लागि आगामी दिनमा संयुक्त कार्यदल गठन गरी स्पष्ट कार्ययोजना बनाइने जानकारी दिइएको छ।
वक्ताहरूले Gen Z आन्दोलनलाई केवल असन्तोषको अभिव्यक्ति होइन, राजनीतिक संस्कृतिमा सुधारको संकेतका रूपमा व्याख्या गरेका छन्। शिक्षा, रोजगारी, मानसिक स्वास्थ्य, सामाजिक न्याय र सुशासनजस्ता मुद्दालाई केन्द्रमा राख्दै युवापुस्ताले देखाएको सक्रियताले राजनीतिक प्रणालीमा नयाँ विश्वास सिर्जना गर्न सक्ने उनीहरूको भनाइ थियो।
कार्यक्रमको अन्त्यमा सहभागीहरूले प्रवासमा रहेका नेपाली समुदायबीच आपसी समझदारी, सहकार्य र एकताको भावना बलियो बनाउन आह्वान गर्दै नयाँ वर्ष २०२६ को शुभकामना आदान–प्रदान गरेका थिए। भेलाको साझा सन्देश स्पष्ट थियो— “एकतामा शक्ति छ, र एकताबाटै राष्ट्रिय परिवर्तन सम्भव छ।”
