मेलबर्नमा आयोजित एक अन्तरक्रिया कार्यक्रममा वरिष्ठ पत्रकार किशोर नेपालले आफ्नो पाँच दशक लामो पत्रकारिता यात्राका अनुभव नेपाली समुदायसँग साझा गरेका छन्। केबीसी खबरद्वारा शनिबार आयोजित उक्त कार्यक्रममा उनले नेपाली राजनीतिक परिवेश, वर्तमान अवस्था र वैकल्पिक राजनीतिक शक्तिको सम्भावनाबारे विश्लेषण प्रस्तुत गरे।
नेपालले विगतका राजनीतिक घटनाक्रमको समीक्षा गर्दै मुलुकको वर्तमान परिस्थितिमा प्रमुख दलहरूको भूमिका र उनीहरूको कार्यशैलीमाथि टिप्पणी गरे। उनका अनुसार, प्रमुख दलहरूले नयाँ सोच विकसित गर्ने सम्भावना रहे पनि नेतृत्व तहमा रहेको व्यक्तिवादी प्रवृत्तिले मुलुकलाई सही मार्गमा अघि बढ्न कठिन बनाइरहेको छ।
वैकल्पिक राजनीतिक शक्तिहरूको उदयबारे चर्चा गर्दै उनले पछिल्लो समय देखा परेका नयाँ राजनीतिक धाराहरू जनआक्रोशको परिणाम मात्र भएको उल्लेख गरे। उनका अनुसार, दीर्घकालीन वैकल्पिक शक्ति बन्न संस्थागत संरचना र सैद्धान्तिक स्पष्टता अपरिहार्य हुन्छ।
कार्यक्रममा सहभागीहरूले नेपालको राजनीतिक गतिरोध तथा सञ्चार क्षेत्रको भूमिकाबारे जिज्ञासा राखेका थिए। नेपालले सञ्चारमाध्यमहरूको जिम्मेवारी अझ महत्त्वपूर्ण रहेको बताउँदै प्रभावकारी पत्रकारिता नै राजनीतिक परिवर्तनको एक सशक्त माध्यम बन्न सक्ने विचार व्यक्त गरे।
