एजेन्सी । उत्तर प्रदेशको गोरखपुर जिल्लाको खजनी क्षेत्रमा एक अचम्मको घटना सार्वजनिक भएको छ । एक विवाह समारोहमा बेहुली नगद, गरगहना लिएर भागेकी छिन् । यससँगै उनकी आमा पनि विवाहस्थलबाट बेपत्ता भएकी छिन् ।
भारतीय सञ्चार माध्यमहरूका अनुसार यो घटना ४० वर्षीय किसानसँग सम्बन्धित छ, जो आफ्नो दोस्रो विवाहको अनुष्ठान गर्दै थिए । सीतापुर जिल्लाको गोविन्दपुर गाउँका बासिन्दा ती किसानले आफ्नी पहिलो पत्नीको निधनपछि दोस्रो विवाह गर्ने निर्णय गरेका थिए ।
दोस्रो विवाहका लागि उनले एक मध्यस्थकर्ताको सहयोग लिँदै ३०,००० रुपैयाँ दिएर विवाहको तयारी गरेका थिए । विवाहअघि बेहुलीलाई साडी र गरगहना उपहार दिइएको थियो, र सम्पूर्ण खर्च बेहुलाले नै बेहोरेका थिए ।
विवाह समारोह मन्दिरमा आयोजना गरिएको थियो, जहाँ बेहुली आफ्नी आमासँग आएकी थिइन् । विवाहको संस्कार सुरु हुने बेलामा बेहुलीले शौचालय जाने बहाना बनाइन् । त्यसपछि उनी र उनकी आमा दुबै बेपत्ता भए ।
बेहुलाले लामो समयसम्म कुर्दा पनि बेहुली नफर्केपछि घटनाबारे स्थानीय प्रहरीमा जानकारी गराइएको छ । प्रहरीले घटनाको अनुसन्धान गरिरहेको छ । यो घटना किसान र उनका परिवारका लागि ठूलो झड्का बनेको छ । स्थानीय बासिन्दाहरूले पनि यो घटनालाई अचम्मका रूपमा लिएका छन् ।
