काठमाडौं। फिल्म ‘फेरि रेशम फिलिली’को प्रदर्शन मिति घोषणा गरिएको छ। निर्माण टिमले आइतबार साँझ पोस्टर सार्वजनिक गर्दै महाशिवरात्रिको अवसर पारेर फागुन १४ गते रिलिज हुने जानकारी दिएको हो।
पोस्टरमा प्रमुख कलाकार विनय श्रेष्ठ र सुपुष्पा भट्टलाई उनीहरूको पात्र अनुसारको लुक्समा प्रस्तुत गरिएको छ। यो फिल्म सन् २०१५ मा आएको हिट फिल्म ‘रेशम फिलिली’को दोस्रो श्रृंखला हो। दर्शकले विनय श्रेष्ठलाई पुरानै भूमिकामा देख्न सक्नेछन्।
फिल्म सिनेमा आर्टको प्रस्तुति र भी मोसन पिक्चर्सको सहकार्यमा बनेको हो। यसको लेखन तथा निर्देशन निरोज महर्जनले गरेका छन् भने रौनकविक्रम कँडेल निर्माता छन्। सहनिर्माताको रुपमा एनी थापा र कार्यकारी निर्माताको भूमिकामा सुरज बम ठकुरी रहेका छन्।
कलाकारहरूको सूचीमा नीर शाह, लक्ष्मी गिरी, प्रकाश घिमिरे, शिशिर वाङ्गदेल, रविन्द्र झा, महेश त्रिपाठी, काजल कर्ण, एवनराज उप्रेती र मेक्सम गौडेल पनि छन्।
फिल्मको छायांकन सुसन प्रजापतिले गरेका छन्। पटकथा निरोज महर्जन र आकाश बरालले तयार पारेका हुन्। संगीतमा कालीप्रसाद बाँसकोटा, एसडी योगी, हर्क साउद, जयन जे वाइवा र दीपक शर्माको योगदान रहेको छ।
महाशिवरात्रिको दिन ‘फेरि रेशम फिलिली’सँगै ‘लाज शरणम’ र ‘मायावी’ पनि रिलिज हुने घोषणा भइसकेको छ।
