एजेन्सी । जाडोयाम सुरु भइसकेको छ, र मानिसहरूले आफ्नो ज्याकेट र न्यानो कपडाहरू निकालिसकेका छन् । तर, जहाँ केही मानिसहरू अझै हल्का ज्याकेट लगाएर सहज महसुस गर्छन्, केहीलाई चाहिँ पहिले नै अत्यधिक जाडो महसुस हुन थालेको छ । के तपाईँ पनि यस्तै अनुभव गर्नुहुन्छ ? यदि हो भने, यसको जवाफ विज्ञानसँग छ । तपाईँलाई बढी जाडो महसुस हुनुको कारण मात्र मौसम नभई, शरीरमा भएका केही भिटामिनको कमी पनि हुन सक्छ । आउनुहोस्, थाहा पाऔँ किन यस्तो हुन्छ र मेडिकल साइन्स यस बारे के भन्छ ।
शरीरले तापक्रम कसरी नियन्त्रण गर्छ ?
शरीरले तापक्रम नियन्त्रण गर्ने प्रक्रियालाई थर्मोरेगुलेसन भनिन्छ । शरीरमा भिटामिन र पोषण तत्वहरूको कमी- जस्तै, आइरन, भिटामिन B12 र फोलेटको कमी यस प्रक्रियामा बाधा पुर्याउन सक्छ । यही कारणले गर्दा यी पोषकतत्वहरूको अभावमा शरीरले आफ्नो तापक्रम सन्तुलनमा राख्न नसक्दा तपाईँलाई बढी जाडो महसुस हुन्छ ।
आइरन किन महत्त्वपूर्ण छ ?
आइरन शरीरमा हिमोग्लोबिन बनाउनका लागि अत्यावश्यक हुन्छ । हिमोग्लोबिन रेड ब्लड सेल्समा पाइने प्रोटिन हो, जसले शरीरभरि अक्सिजन पुर्याउने काम गर्छ । जब शरीरको मांसपेशी र टिस्युहरूले पर्याप्त अक्सिजन पाउँदैनन्, तिनीहरूले आवश्यक तापक्रम उत्पादन गर्न सक्दैनन् । यस अवस्थालाई आइरन डेफिसेन्सी एनेमिया भनिन्छ । यसका कारण तपाईँलाई जाडो महसुस हुनुका साथै थकान र कमजोरी जस्ता समस्या देखा पर्न सक्छन् ।
भिटामिन B12 को कमी
भिटामिन B12 शरीरमा स्वस्थ रेड ब्लड सेल्स निर्माण गर्न र मस्तिष्कलाई सही ढंगले काम गर्न मद्दत गर्छ । यसको कमीले शरीरमा रेड ब्लड सेल्स उत्पादन प्रक्रियालाई अवरोध पुर्याउँछ, जसले गर्दा अक्सिजन सर्कुलेशनमा समस्या देखिन्छ । यसका कारण हातखुट्टामा अत्यधिक चिसो महसुस हुने र जाडो प्रतिरोध गर्ने क्षमतामा कमी आउने सम्भावना हुन्छ ।
फोलेट (भिटामिन B9) को कमी
फोलेटले भिटामिन B12 सँग मिलेर रेड ब्लड सेल्स निर्माण गर्ने काम गर्छ । यसको कमीले शरीरमा रक्त उत्पादन प्रक्रियामा अवरोध पुर्याउँछ । यसका कारण शरीरमा अक्सिजनको आपूर्ति कम हुन्छ, जसले गर्दा जाडो महसुस हुने, थकान र रक्तसञ्चारमा समस्या देखिन्छ ।
भिटामिन C र आइरनको अवशोषण
भिटामिन C स्किन हेल्थका लागि मात्र नभई शरीरमा आइरनको अवशोषणका लागि पनि अत्यन्त महत्त्वपूर्ण हुन्छ । यदि शरीरमा पर्याप्त भिटामिन C नपुगेमा, तपाईँले आइरनयुक्त खानेकुरा खाँदा पनि त्यसको पूरा फाइदा लिन सक्नुहुन्न । यसले एनेमिया जस्ता समस्याहरू निम्त्याउन सक्छ, जसले गर्दा तपाईँलाई लगातार जाडो महसुस हुन सक्छ ।
यदि तपाईँलाई अरूभन्दा बढी जाडो महसुस हुन्छ भने, यस संकेतलाई गम्भीर रूपमा लिनुहोस् । यो हाइपोथायरायडिज्म, रेनोड्स डिजिज वा पोषकतत्वहरूको गम्भीर कमीको संकेत हुन सक्छ । ब्लड टेस्टमार्फत तपाईँको शरीरमा आइरन, भिटामिन B12, फोलेट वा भिटामिन C को मात्रा जाँच गर्न सक्नुहुन्छ । यसका लागि तुरुन्तै चिकित्सकको परामर्श लिनुहोस् ।
