अष्ट्रेलियाका विभिन्न राज्य तथा क्षेत्रले ज्येष्ठ नागरिकको दैनिक आवतजावत सहज बनाउन निःशुल्क वा न्यून शुल्कमा सार्वजनिक यातायात सुविधा उपलब्ध गराउँदै आएका छन्। तर, यस्तो सुविधा देशभर समान छैन र राज्यअनुसार नियम, उमेर सीमा तथा सहुलियतको प्रकार फरक रहेको छ।
तास्मानिया सरकारले सबै यात्रुका लागि सञ्चालन गरेको निःशुल्क सार्वजनिक यातायात परीक्षण कार्यक्रम ३० जुन २०२७ सम्म विस्तार गरेको छ। यो सुविधा Metro Tasmania, Tassielink Transit, Kinetic, Manions Coaches, Calows Coaches, Area Connect र Derwent Ferries का सेवामा लागू हुनेछ। परीक्षण अवधिमा Metro बस सेवाको प्रयोग करिब ३७ प्रतिशत र Kinetic सेवाको प्रयोग करिब ४६ प्रतिशतले बढेपछि कार्यक्रम विस्तार गरिएको हो।
क्वीन्सल्याण्डमा Translink नेटवर्कअन्तर्गतका बस, रेल, फेरी र ट्राममा ५० सेन्टको एकसमान भाडा लागू गरिएको छ। Airtrain सेवा भने यस योजनामा समावेश छैन। ब्रिस्बेनमा Senior go card वा Seniors Card +go प्रयोग गर्ने ज्येष्ठ नागरिकले अफ–पिक समयमा Brisbane City Council का बस, CityCat र फेरी सेवामा निःशुल्क यात्रा गर्न सक्छन्। सप्ताहन्त र सार्वजनिक बिदाका दिन काउन्सिल बसमा ज्येष्ठ नागरिकका लागि दिनभर यात्रा निःशुल्क छ।
दक्षिण अष्ट्रेलियामा Seniors Card धारकले Adelaide Metro का बस, रेल र ट्राममा हरेक दिन निःशुल्क यात्रा गर्न पाउँछन्। पश्चिम अष्ट्रेलियामा WA Seniors SmartRider धारकले अफ–पिक समयमा निःशुल्क र अन्य समयमा सहुलियतपूर्ण भाडामा यात्रा गर्न सक्छन्।
क्यानबेरामा ६० देखि ६९ वर्ष उमेर समूहका ज्येष्ठ नागरिकलाई अफ–पिक समयमा निःशुल्क यात्रा सुविधा उपलब्ध छ। ७० वर्ष वा सोभन्दा माथिका नागरिकले भने सार्वजनिक यातायातमा जुनसुकै समयमा पनि निःशुल्क यात्रा गर्न सक्छन्।
न्यू साउथ वेल्समा ज्येष्ठ नागरिकका लागि सामान्य रूपमा पूर्ण निःशुल्क यात्रा व्यवस्था छैन। तर, योग्य Seniors Card धारकले Gold Senior/Pensioner Opal Card मार्फत दैनिक २.५० अष्ट्रेलियन डलरमा मेट्रो, रेल, बस, फेरी र लाइट रेलमा असीमित यात्रा गर्न सक्छन्। यो सुविधा ग्रेटर सिड्नी, ब्लू माउन्टेन्स, सेन्ट्रल कोस्ट, हन्टर, इलावारा र सदर्न हाइल्यान्ड्ससम्म लागू हुन्छ।
भिक्टोरियामा Seniors Card धारकले कार्यदिवसमा सार्वजनिक यातायातको भाडामा ५० प्रतिशत छुट पाउँछन् भने सप्ताहन्तमा राज्यभर निःशुल्क यात्रा गर्न सक्छन्।
नर्दर्न टेरिटोरीको ग्रेटर डार्विन क्षेत्र र एलिस स्प्रिङ्समा हाल सबै यात्रुका लागि सार्वजनिक बस सेवा निःशुल्क छ। तर, जनवरी २०२७ मा नयाँ टिकट प्रणाली लागू भएपछि यो व्यवस्था परिवर्तन हुन सक्ने जनाइएको छ।
अष्ट्रेलियाबाहिर पनि निःशुल्क सार्वजनिक यातायातको अभ्यास विस्तार हुँदै गएको छ। लक्जेम्बर्गले सन् २०२० देखि बस, ट्राम र अधिकांश रेल सेवा निःशुल्क बनाएको छ। फ्रान्सको मोन्टपेलियरमा पनि स्थानीय बासिन्दाले बस र ट्राममा निःशुल्क यात्रा गर्न पाउँछन्।
यस्ता योजनाका समर्थकहरूका अनुसार सस्तो र सहज सार्वजनिक यातायातले ज्येष्ठ नागरिकलाई स्वास्थ्य सेवा, किनमेल, सामाजिक कार्यक्रम तथा परिवारसँगको भेटघाटमा सहज पहुँच दिलाउँछ। यसले सामाजिक एक्लोपन कम गर्न, सक्रिय जीवनशैली कायम राख्न र स्वस्थ वृद्धावस्थालाई सहयोग पुर्याउने अपेक्षा गरिएको छ।
