Western Australia मा मिजल्स (Measles) संक्रमण तीव्र रूपमा फैलिँदै गएको छ। हालै Indonesia बाट फर्किएका दुई यात्रुमा नयाँ संक्रमण पुष्टि भएपछि स्वास्थ्य अधिकारीहरूले सतर्कता अपनाउन आग्रह गरेका छन्। यो वर्ष मात्रै Western Australia मा ५० भन्दा बढी मानिस मिजल्सबाट संक्रमित भइसकेका छन्, जसले राज्यका स्वास्थ्य निकायहरूलाई उच्च सतर्कतामा राखेको छ।
WA Health का अनुसार Perth, South West र Great Southern क्षेत्रका विभिन्न १२ स्थानहरूलाई सम्भावित संक्रमण क्षेत्र (exposure sites) का रूपमा चिनिएको छ। ती स्थानहरूमा Bunbury, Donnybrook, Treendale, Cowaramup, Denmark, Albany, Kojonup र Perth International Airport पनि समावेश छन्। ती स्थानहरूमा सोही समयमा पुगेका मानिसहरूलाई १८ दिनसम्म लक्षणहरू अनुगमन गर्न र शंका लागेमा तुरुन्त परीक्षण गर्न आग्रह गरिएको छ।
WA Health का प्रवक्ताले मिजल्स अत्यन्तै संक्रामक रोग भएको बताउँदै भनेका छन् , “संक्रमित व्यक्तिले छोडेका हावाका थोपा ३० मिनेटसम्म पनि हावामा रहन सक्छन् र त्यस अवधिमा कोही त्यहाँ प्रवेश गरेमा उनीहरू पनि संक्रमित हुन सक्छन्।”
मिजल्सका लक्षणहरूमा ज्वरो, खोकी, नाकबाट पानी बग्ने, आँखाको रातोपन र शरीरभरि दाना आउनु मुख्य रूपमा देखा पर्छ। स्वास्थ्य अधिकारीहरूले लक्षण देखिए तुरुन्त मास्क लगाएर अलग बस्न र अस्पताल वा चिकित्सकसँग सम्पर्क गर्नु अघि फोनमार्फत सल्लाह लिन सिफारिस गरेका छन्, ताकि अन्य बिरामी वा स्वास्थ्यकर्मीमा संक्रमण फैलिन नसकोस ।
WA Health ले सबै नागरिकलाई मिजल्सविरुद्धको खोप अद्यावधिक गर्न र विदेश यात्रा गर्नुअघि चिकित्सकसँग परामर्श गर्न आग्रह गरेको छ। विशेषगरी Indonesia, India, Philippines, Malaysia जस्ता देशहरूबाट फर्किने यात्रुहरूलाई उच्च जोखिम समूहमा राखिएको छ।
गत केही हप्तादेखि Western Australia मा मिजल्सका केसहरू निरन्तर बढिरहेका छन्। केही संक्रमितहरू विदेशबाट फर्किएका यात्रुहरूमा देखिएका छन् भने केही केसहरू स्थानीय संक्रमणका रूपमा चिनिएका छन्।
अन्ततः, स्वास्थ्य अधिकारीहरूले जनतालाई सावधानी अपनाउन, खोप पूरा गर्न र लक्षण देखिए तुरुन्त अलग बस्न अनुरोध गरेका छन्। उनका अनुसार, “मिजल्स रोकथाम गर्न सकिने रोग हो, तर खोप नलगाइएका व्यक्तिहरूका कारण यो समुदायमा पुनः फैलन सक्छ।”
