काठमाडौं । नेपाल पत्रकार महासंघले देश राजनीतिक र सामाजिक रूपमा गम्भीर संक्रमणकालीन अवस्थामा रहेको भन्दै तत्काल सुरक्षित अवतरण आवश्यक भएको बताएको छ। महासंघले मंगलबार विज्ञप्ति जारी गर्दै हाल देशभर चर्किएको ‘जेन–जी आन्दोलन’ले उठाएका मुद्दा र मागलाई गम्भीर रूपमा सम्बोधन गर्न सरकार तथा राजनीतिक दलहरूलाई आग्रह गरेको हो।
युवाको आन्दोलनलाई नदबाउन चेतावनी
महासंघले भ्रष्टाचार, बेथिति र अपारदर्शी शासन व्यवस्थाविरुद्ध जेन–जी पुस्ताले उठाएको आवाजलाई दबाउन गरिएको सरकारी दमनप्रति कडा आपत्ति जनाएको छ। विज्ञप्तिमा भनिएको छ, “देशमा व्याप्त भ्रष्टाचार र बेथितिविरुद्ध उठेको युवाको आवाजलाई दबाउन गरिएको सरकारी दमन निन्दनीय छ। मागलाई विमर्शमार्फत सम्बोधन नगरी दमनमार्फत दबाउने प्रयास अस्वीकार्य छ।”
संवैधानिक प्रक्रियामार्फत निकास खोज्नुपर्ने जोड
हालै प्रधानमन्त्रीले राजीनामा गरिसकेको र नयाँ सरकार गठन नहुँदा मुलुक नेतृत्वविहीन अवस्थामा पुगेको भन्दै महासंघले संविधानले तोकेको मार्गअनुसार मात्र समाधान खोज्न सकिने उल्लेख गरेको छ। “लोकतन्त्रलाई अझ मजबुत बनाउन संवैधानिक प्रक्रिया र संस्थागत मार्गकै विकल्प छैन,” विज्ञप्तिमा भनिएको छ। यससँगै राजनीतिक स्थायित्व कायम गरी मुलुकलाई सहज निकास दिन दलहरूबीच छलफल आवश्यक रहेको महासंघले स्पष्ट पारेको छ।
पत्रकार र मिडियामाथि आक्रमणप्रति आपत्ति
महासंघले हाल देशभर पत्रकारहरू असुरक्षित बनेको तथ्य सार्वजनिक गरेको छ। चार जना पत्रकार गोली लागेर घाइते भएको र धेरै मिडिया हाउसमा आक्रमण तथा आगजनी भएको विवरण उल्लेख गर्दै महासंघले यो अवस्थालाई आपत्तिजनक भनेको छ। “जनतालाई सुसूचित गर्ने र लोकतन्त्र बलियो बनाउन अग्रपंक्तिमा रहेका पत्रकार र मिडियालाई आन्दोलनको निसाना बनाइएको छ, जुन गम्भीर समस्या हो,” विज्ञप्तिमा भनिएको छ।
क्षतिपूर्ति र सुरक्षा सुनिश्चित गर्न माग
महासंघले राज्यसँग मिडिया हाउस र पत्रकारलाई भएको क्षतिको उचित क्षतिपूर्ति दिन माग गरेको छ। साथै, राज्य र आन्दोलनकारी दुवैलाई प्रेस तथा पत्रकारमाथि आक्रमण नगर्न चेतावनी दिँदै प्रेस स्वतन्त्रता कुण्ठित नहुने वातावरण बनाउन आग्रह गरेको छ।
नेपाल पत्रकार महासंघको भनाइमा अहिले मुलुकको राजनीतिक अनिश्चिततामध्ये युवाले उठाएको आवाजलाई सम्मान नगरे लोकतन्त्रमा थप संकट आउन सक्छ। त्यसैले जेन–जी पुस्ताका मागलाई गम्भीर विमर्शमार्फत सम्बोधन गर्न, संवैधानिक मार्गबाट राजनीतिक स्थायित्व कायम गर्न र पत्रकार–मिडियामाथि भएका आक्रमण तुरुन्त बन्द गर्न महासंघले जोड दिएको छ।
