मेलबर्न — अष्ट्रेलियाको मेलबर्नको दक्षिणपूर्वी उपनगर माउण्ट वेभरलीमा गर्भवती महिला एथेना जर्जोपोलोस (३९) र उनका साथी एन्ड्र्यु गन (५०) को निर्मम हत्या आरोपमा ३४ वर्षीय रोस जुडलाई पक्राउ गरी थुनामा राखिएको छ। सोमबार राति एड्रियन क्रेसेन्टस्थित एक युनिटभित्र दुवैको शव फेला परेको थियो।
भिक्टोरिया पुलिसका अनुसार सोमबार राति करिब ९:५५ बजे स्थानीयले घरभित्र विवाद र चर्को आवाज आएको जानकारी दिएपछि क्रिटिकल इन्सिडेन्ट रिस्पोन्स टिमसहित ठूलो संख्यामा प्रहरी घटनास्थल पुगेका थिए। अनुसन्धानकै क्रममा प्रहरीले केही किलोमिटर टाढा वेस्टल रेल्वे स्टेशनमा दुईवटा कुकुरसहित ३४ वर्षीय पुरुषलाई पक्राउ गरेको थियो। मंगलबार राति उनलाई दुईवटा हत्या मुद्दामा आरोप लगाइएको हो।
बुधबार मेलबर्न मजिस्ट्रेट अदालतमा पेश हुँदा मुद्दा आगामी वर्ष जनवरीसम्मका लागि स्थगित गरिएको छ। यो उनको पहिलोपटक थुनामा रहेको अनुभव भएको अदालतमा सुनाइयो। उनको तर्फबाट धरौटीको माग गरिएको थिएन।
मृतकको परिवार र साथीहरू आक्रन्दमा
घटनापछि पीडितको साथी एलिशा ब्राउनले फूल चढाउँदै श्रद्धाञ्जली दिँदै जर्जोपोलोसलाई “सधैं हाँस्ने, खुसी र रमाइलो गर्ने स्वभावकी” भएको बताइन्। उनले जर्जोपोलोस गर्भवती रहेको र दुवैजना आफ्नो शिशुको आगमनप्रति उत्साहित रहेकोसमेत खुलासा गरिन्।
त्रासदीपूर्ण घटनास्थल र ग्राफिटीको रहस्य
हत्या विभागका डिटेक्टिभ इन्स्पेक्टर डिन थोमसका अनुसार घटनास्थल अत्यन्त त्रासदीपूर्ण रहेको र घटनामा संलग्न प्रहरी र स्थानीयलाई मनोवैज्ञानिक सहयोग उपलब्ध गराइनेछ। युनिटको अगाडिको भागमा “karma”, “betrayal” र “enough is enough” जस्ता शब्दहरू ग्राफिटीमार्फत लेखिएका थिए। प्रहरी घटनासँग ग्राफिटीको सम्बन्धबारे अनुसन्धान गरिरहेको छ।
स्थानीय बासिन्दाहरू स्तब्ध
स्थानीय बासिन्दाहरूले घटनापछि आफूहरू आत्तिएको र दु:खी भएको बताएका छन्। “यो अकल्पनीय छ, आफ्नै गलीमा यस्तो घटना हुन्छ भन्ने कसैले पनि सोच्दैन,” एक छिमेकीले भने।
पुलिसले अनुसन्धानलाई तीव्र पार्दै घटनाका सम्पूर्ण पाटो पत्ता लगाउने प्रतिबद्धता जनाएको छ।
