क्यानबेरा – अष्ट्रेलियाको संघीय सरकारले मानसिक स्वास्थ्य सेवामा सहज पहुँच र लागत कम गर्न थालेको राष्ट्रिय अभियानअन्तर्गत टगरानोङमा नयाँ मेडिकेयर मानसिक स्वास्थ्य केन्द्र उद्घाटन गरिएको छ।
यो क्यानबेराको दोस्रो ‘वाक–इन’ निःशुल्क मानसिक स्वास्थ्य सेवा हो, जसले संकटमा परेकालाई बिना अपोइन्टमेन्ट वा रिफरल तुरुन्तै सहयोग प्रदान गर्नेछ।
केन्द्रको उद्घाटन संघीय मानसिक स्वास्थ्य तथा आत्महत्या रोकथामका सहायक मन्त्री एम्मा म्याकब्राइड र ACT का सांसद डेभिड स्मिथले संयुक्त रूपमा गरे। स्मिथले टगरानोङ र दक्षिण क्यानबेराका बासिन्दाका लागि यसलाई ठुलो उपलब्धि भएको बताए।
केन्द्रमा तत्काल मूल्यांकन, उपचार, सहयोग र ‘नेभिगेसन सपोर्ट’ उपलब्ध हुनेछ। क्यापिटल हेल्थ नेटवर्क (CHN) की सीईओ स्टेसी लिभेन्सका अनुसार, मानसिक स्वास्थ्य सेवाका धेरै विकल्प भए पनि पहुँच पाउन गाह्रो हुने भएकाले केन्द्रका कर्मचारीहरूले सेवाग्राहीलाई आवश्यक सहयोगमा जोड्ने जिम्मेवारी लिनेछन्।
यो केन्द्र अष्ट्रेलियाभर खोलिने ६१ मेडिकेयर मानसिक स्वास्थ्य केन्द्रमध्ये एक हो। हालसम्म ४१ सञ्चालनमा आइसकेका छन् भने बाँकी २० अर्को वर्षभित्र खोलिने योजना छ। यसले निजी मनोविज्ञहरूको सब्सिडाइज्ड सेवामाथि पर्ने दबाब पनि कम गर्ने विश्वास गरिएको छ।
ACT स्वास्थ्य मन्त्री राचेल स्टेफन–स्मिथले नयाँ केन्द्रले समुदायलाई समयमै, पहुँच योग्य र प्रभावकारी उपचार दिन मद्दत गर्ने र अस्पतालमा पर्ने चाप घटाउने बताए।
संघीय सरकारले यो कार्यक्रमका लागि करिब १ अर्ब डलर छुट्याएको छ। यसमा:
- २२५ मिलियन डलर मेडिकेयर मानसिक स्वास्थ्य केन्द्रहरूका लागि,
- २०० मिलियन डलर ५८ नयाँ ‘हेडस्पेस’ सेवाहरूका लागि,
- ५०० मिलियन डलर २० युवा–विशेषज्ञ प्रारम्भिक उपचार केन्द्रका लागि,
- ९० मिलियन डलर १,२०० भन्दा बढी मानसिक स्वास्थ्य पेशेवर तालिमका लागि छुट्याइएको छ।
टगरानोङमा खुलेको यो नयाँ मानसिक स्वास्थ्य केन्द्रलाई संघीय तथा ACT सरकारले क्यानबेराका बासिन्दा र उनीहरूको परिवारलाई समयमै, निःशुल्क र गुणस्तरीय उपचार दिने ठुलो उपलब्धि मानिएको छ।
