राष्ट्रिय स्वतन्त्र पार्टी (रास्वपा) की सांसद सुमना श्रेष्ठले प्रधानमन्त्री केपी शर्मा ओलीको हालैको मधेश भ्रमणप्रति कटाक्ष गर्दै, “हेलिकप्टरबाट हेर्न जाँदैमा मधेशमा पानी आउँदैन” भन्ने तीव्र टिप्पणी गरेकी छन्।
१२ साउन सोमबार, संसदको कृषि, सहकारी तथा प्राकृतिक स्रोत समितिको बैठकमा भूमि सम्बन्धी केही नेपाल ऐनलाई संशोधन गर्ने विधेयकमाथि छलफल हुँदै गर्दा श्रेष्ठले प्रधानमन्त्री ओली लक्षित गर्दै यो अभिव्यक्ति दिएकी हुन्।
उक्त बैठकमा उनले भनिन्, “खडेरी पर्यो भनेर हेलिकप्टरमा हेर्न जाँदैमा मधेशमा पानी आउँदैन। चुरेको कुरा जोडिन्छ।” उल्लेखनीय छ कि प्रधानमन्त्री ओली साउन ७ गते मधेशको खडेरी प्रभावित क्षेत्रको निरीक्षणका लागि हेलिकप्टरमार्फत पुगेका थिए।
“निर्वाचनदेखि निर्वाचन सोचेर हुँदैन”
श्रेष्ठले समस्या समाधानका लागि दीर्घकालीन सोच आवश्यक भएको भन्दै केवल चुनाव नजिकिँदा देखाउने सक्रियता पर्याप्त नहुने तर्क दिइन्। “मधेशमा भएको अभावलाई गम्भीर रूपमा हेरौं। समस्या चुरेको संरक्षण र व्यवस्थापनसँग जोडिएको छ। निर्वाचनदेखि निर्वाचन सोचेर हुँदैन,” उनले भनिन्।
सरकारलाई सार्वजनिक जग्गाबारे चेतावनी
श्रेष्ठले सरकारले सार्वजनिक जग्गामा आँखा नलगाउन आग्रह गर्दै वन तथा राष्ट्रिय निकुञ्जसँग सम्बन्धित कानुनी धाराहरू खारेज गर्न माग गरिन्।
उनको भनाइमा, “सार्वजनिक स्रोतसाधनमा राज्यको जिम्मेवारी प्रष्ट हुनुपर्छ। संरक्षणका नाममा जनताको पहुँच बन्द गर्ने प्रवृत्ति रोकिनुपर्छ।”
भूमि विधेयकमाथि पनि संशोधन प्रस्ताव
बैठकमा श्रेष्ठले भूमिसम्बन्धी प्रस्तावित संशोधन विधेयकप्रति आफ्नो असहमति जनाउँदै जनताको पहुँच सुनिश्चित गर्नेगरी कानुनी खाका तयार पार्नुपर्ने धारणा राखिन्। उनले वन क्षेत्र, सार्वजनिक जग्गा र निकुञ्जसँग सम्बन्धित प्रावधानहरूले स्थानीय समुदायको अधिकार प्रभावित पार्ने तर्क गरिन्।
