नर्दन टेरिटोरी, अष्ट्रेलिया — सन् २०१९ मा अष्ट्रेलियाको युएन्डुमुमा प्रहरी गोलीकाण्डमा परी मृत्यु भएका १९ वर्षीय आदिवासी युवक कुमान्जायी वाल्कर प्रकरणमा संलग्न प्रहरी अधिकृत जाचारी रोल्फ जातीय रूपमा पूर्वाग्रही रहेको निष्कर्ष नर्दन टेरिटोरीकी कोरोनर एलिजाबेथ आर्मिटेजले सार्वजनिक गरेकी छन्।
चार वर्ष लामो छानबिनपछि सार्वजनिक गरिएको ६०० पृष्ठ लामो प्रतिवेदनमा रोल्फको जातीय सोच, लापरवाहीपूर्ण आचरण र प्रहरी संगठनभित्रको ‘संस्थागत जातीयता’ (institutional racism) प्रति गम्भीर चिन्ता व्यक्त गरिएको छ।
कोरोनरका अनुसार, वाल्करको मृत्यु “Officer-Induced Jeopardy” — अर्थात् प्रहरी स्वयंले सिर्जना गरेको जोखिमको परिणाम थियो, जुन पूर्ण रूपमा टार्न सकिने घटना हो।
रोल्फ र उनका सहकर्मीहरूबीच आदान–प्रदान भएका सन्देशहरूमा बारम्बार जातीय अपमान झल्काउने भाषा प्रयोग गरिएको उल्लेख छ। प्रहरी प्रशासनले यस्ता व्यवहारहरू नियन्त्रण गर्न नसक्दा घटना झन् गम्भीर बन्दै गएको निष्कर्ष निकालिएको छ।
पीडित वाल्करका आफन्तहरूले अझै पनि न्यायको खोजी गरिरहेका छन्। उनकी बहिनी समारा फर्नान्डेज–ब्राउनले भनिन्, “हामी हरेक दिन उनको अभाव महसुस गर्छौं। यो घटनाले हाम्रो समुदायमा गहिरो घाउ छोडेको छ।”
प्रकरणले अष्ट्रेलियाको प्रहरी प्रणालीभित्र आदिवासी समुदायप्रति हुने व्यवहार, संस्थागत पूर्वाग्रह र सुधारको आवश्यकतालाई गम्भीर ढंगले उजागर गरेको छ।
