बंगलादेशकी पूर्वप्रधानमन्त्री तथा अवामी लिगकी नेतृ शेख हसिनालाई अदालतको अवहेलनाको अभियोगमा बंगलादेशको अन्तर्राष्ट्रिय अपराध न्यायाधिकरण (ICT) ले ६ महिनाको जेल सजाय सुनाएको छ।
ढाका ट्रिब्युनका अनुसार न्यायाधीश एमडी गोलाम मोर्तुजा मोजुम्दारको अध्यक्षतामा रहेको तीन सदस्यीय इजलासले बुधबार उक्त फैसला सुनाएको हो। अदालतले गोविन्दगञ्जका शाकिल आकन्द बुलबुललाई पनि सोही मुद्दामा २ महिनाको कैद सजाय सुनाएको छ।
शेख हसिनामाथि यसअघि सन् २०२५ को जुनमा अन्तर्राष्ट्रिय अपराध न्यायाधिकरणले औपचारिक रूपमा ‘मानवता विरुद्धका अपराध’ को आरोप लगाएको थियो। अभियोजन पक्षका अनुसार, सन् २०२४ को जुलाई र अगस्ट महिनामा भएको जनविद्रोहको क्रममा भएका सामूहिक हत्याको प्रमुख आदेशकर्ता शेख हसिना रहेको दाबी गरिएको छ।
मुख्य अभियोजक मोहम्मद ताजुल इस्लामले अदालतमा पेश गरेको आरोपपत्रमा हसिनालाई सो हिंसात्मक घटनाहरूको योजनाकारका रूपमा उल्लेख गरिएको छ। ती घटनाक्रमकै बीच, अगस्ट ५, २०२४ मा शेख हसिनाले प्रधानमन्त्री पदबाट राजीनामा दिँदै भारततर्फ प्रस्थान गरेकी थिइन्।
सञ्चार माध्यमका अनुसार, उनी पदत्याग गरेपछि ढाका लगायतका सहरहरूमा कर्फ्युको उल्लंघन गर्दै हजारौं जनता सडकमा उत्रिएका थिए। शेख हसिना ११ महिनाअघि देश छाडेकी थिइन्।
यो फैसला बंगलादेशको न्यायिक इतिहासमा महत्वपूर्ण घटनाका रूपमा हेरिएको छ, जसले मानव अधिकार उल्लंघनमा संलग्न उच्च पदस्थ व्यक्तिहरूमाथि पनि कानूनको कठोरता देखाएको संकेत गर्छ।
