काबुल, अफगानिस्तान — इरानबाट स्वदेश फर्कने अफगान शरणार्थीहरूको सङ्ख्या पछिल्लो समय तीव्र गतिमा बढिरहेको अफगान अधिकारीहरूले बताएका छन्। अफगानिस्तानको पश्चिमी हेरात प्रान्तस्थित इस्लाम काला सीमा नाकाबाट मात्र एकै दिनमा ३० हजारभन्दा बढी शरणार्थीहरू स्वदेश फर्किएको जानकारी दिइएको छ।
प्रान्तीय सूचना र संस्कृति विभागका निर्देशक मौलवी अहमदुल्लाह मुत्ताकीका अनुसार, फर्कने शरणार्थीहरूलाई पानी, खाना र प्राथमिक स्वास्थ्य सेवासहित आवश्यक आपूर्तिहरू तुरुन्त प्रदान गरिएको छ। उनका अनुसार सीमामा आपतकालीन सहयोग टोली परिचालित गरिएको छ जसले स्वदेश फर्किएका नागरिकहरूको तत्कालिक आवश्यकतालाई सम्बोधन गरिरहेको छ।
दुईवटा प्रमुख नाका सक्रिय, शरणार्थी संख्या बढ्दो
अफगान सरकारले इरानसँगको हेरात प्रान्तमा इस्लाम काला र निमरोज प्रान्तमा पुल-ए-अब्रेसम गरी दुईवटा प्रमुख सीमा नाका सञ्चालनमा ल्याएको छ। दुवै नाकाबाट हाल दैनिक हजारौँ शरणार्थीहरू फर्किरहेको बताइएको छ। निमरोज प्रान्तको स्वदेश फिर्ती विभागका अनुसार, पुल-ए-अब्रेसम नाकाबाट मात्र दैनिक २,००० देखि ३,००० जना व्यक्तिहरू र झण्डै ३०० परिवारहरू फर्किरहेका छन्।
विश्वभर ७० लाखभन्दा बढी अफगान शरणार्थी
संयुक्त राष्ट्रसंघीय निकायहरूको अनुमान अनुसार, हाल विश्वभर करिब ७० लाख अफगान शरणार्थीहरू छन्। तीमध्ये अधिकांश कागजातविहीन आप्रवासीका रूपमा इरान र पाकिस्तानमा रहेका छन्। यी शरणार्थीहरूमध्ये धेरैजसो दशकौँको द्वन्द्व, गरिबी र अस्थिर शासन व्यवस्थाको कारण विदेश पलायन भएका हुन्।
इरान र पाकिस्तान दुवै देशमा पछिल्लो समय आप्रवासी व्यवस्थापनमा कडाइ गरिएपछि शरणार्थीहरूको स्वदेश फिर्ती सङ्ख्या उल्लेख्य रूपमा बढेको बताइएको छ। अफगान सरकारका अनुसार, स्वदेश फर्किनेहरूलाई समायोजन गर्न सीमा क्षेत्रमा अस्थायी शिविर, स्वास्थ्य केन्द्र र राहत वितरण केन्द्र स्थापना गरिएको छ।
