क्यानबेरा,अष्ट्रेलियन सरकारले स्वास्थ्य सेवा प्रविधि मैत्री बनाउदै वृद्धाहरुलाई भर्चुअल नर्सिङ सेवा दिन भर्चुअल नर्सिङ फ्रेमवर्क विकास गर्ने कार्यक्रम सहितको बजेट छुटाएको घोषणा गरेको छ ।
वृद्धाश्रमहरूमा स्वास्थ्य सेवा प्रविधिमैत्री बनाउन $३१.२ मिलियनको बजेट छुट्याउँदै भर्चुअल नर्सिङ फ्रेमवर्क विकास गर्ने अष्ट्रेलियन सरकारले घोषणा गरेको हो । प्रविधिमा आधारित स्वास्थ्य सेवाको विस्तार गर्दै ग्रामीण र दुर्गम क्षेत्रमा पनि गुणस्तरीय स्वास्थ्य सुविधा पुर्याउने लक्ष्य अष्ट्रेलियन सरकारले लिएको जनाएको छ ।
सन् २०२५ को मार्चदेखि लागू भएको यो कार्यक्रम २०२७ को जूनसम्म सञ्चालन हुनेछ । विशेष गरी ग्रामीण तथा दुर्गम क्षेत्रका वृद्धाश्रमहरूलाई लक्षित गर्दै भर्चुअल माध्यमबाट नर्सिङ सेवाको गुणस्तर सुधार गर्ने योजना बनाइएको छ । वृद्धाश्रमहरूलाई हेरचाह गर्ने नर्सहरूको अभाव पूर्ति गर्दै डिजिटल माध्यमबाट सहज स्वास्थ्य सेवा उपलब्ध गराउने यो कदमलाई भविष्यको स्वास्थ्य सेवाको नयाँ मोडेल का रूपमा हेरिएको चिकित्सकहरुले जनाएका छन् ।
नयाँ फ्रेमवर्कअन्तर्गत, वृद्धाश्रमका कर्मचारीहरू र सेवाग्राहीहरूले विशेषज्ञ नर्सहरूको भर्चुअल सहायता प्राप्त गर्न सक्नेछन । यसले अस्पतालमा जानुपर्ने अवस्थालाई न्यून गर्ने र वृद्धाश्रमभित्रै उत्कृष्ट स्वास्थ्य सेवा उपलब्ध गराउने लक्ष्य राखिएको छ । यद्यपि, भर्चुअल नर्सिङले प्रत्यक्ष हेरचाहको स्थान लिने छैन, बरु भौतिक सेवासँग मिलेर काम गर्ने डिजिटल सहयोगीका रूपमा रहनेछ ।
भर्चुअल हेल्थकेयरको विकाससँगै स्वास्थ्य क्षेत्रमा नयाँ अवसरहरू खुल्ने अनुमान गरिएको छ । डिजिटल हेल्थ, टेलिमेडिसिन, र भर्चुअल केयर सेवामा दक्ष नर्सहरूको माग बढ्ने भएकाले नर्सहरूका लागि थप तालिम र नयाँ रोजगारीका सम्भावना देखिएको छ । साथै, टेलिहेल्थ, प्रविधि–आधारित परामर्श, र अनलाइन क्लिनिकल सपोर्ट जस्ता क्षेत्रमा विशेषज्ञता हासिल गर्न चाहने स्वास्थ्यकर्मीहरूलाई विशेष प्रशिक्षण उपलब्ध गराउने तयारी भइरहेको छ ।
वृद्धाश्रममा भौगोलिक मात्र नभई भाषिक तथा सांस्कृतिक विविधता पनि रहने भएकाले, विभिन्न भाषा बोल्ने तथा फरक पृष्ठभूमिबाट आएका नर्सहरूका लागि पनि यो योजना अवसरपूर्ण हुने अनुमान गरिएको छ । विशेष गरी गैर–अङ्ग्रेजी भाषी वृद्धहरूको सहजताका लागि बहुभाषिक स्वास्थ्यकर्मीहरूको भूमिकामा वृद्धि हुन सक्ने देखिएको छ ।
