मीनबहादुर भाम निर्देशित नेपाली फिल्म ‘शाम्बाला’ले अस्ट्रेलियामा आयोजित एसिया प्यासिफिक स्क्रिन अवार्ड (APSA) मा ‘युनेस्को कल्चरल डाइभर्सिटी अवार्ड’ जित्दै नेपालको सांस्कृतिक धरोहरलाई अन्तर्राष्ट्रिय स्तरमा परिचित गराएको छ।
माथिल्लो डोल्पाको अनौठो संस्कृति र जनजीवनलाई केन्द्रमा राखेर निर्माण गरिएको यस फिल्मलाई, संस्कृति संरक्षणमा उल्लेखनीय योगदान गरेको भन्दै यो सम्मान प्रदान गरिएको हो। यसअघि नै ‘शाम्बाला’ नेपालबाट ओस्कारको अन्तर्राष्ट्रिय फिचर फिल्म विधामा सिफारिस भइसकेको छ।
फिल्मले स्वदेशमा प्रदर्शनका क्रममा आर्थिक रूपमा अपेक्षित सफलता हासिल गर्न नसके पनि समीक्षात्मक रूपमा सकारात्मक चर्चा बटुल्न सफल भएको थियो। थिन्ले ल्हामो, सोनम तोप्देन, तेन्जिन दल्हा, कर्मा वाङ्ग्याल गुरुङ, र कर्मा शाक्य जस्ता कलाकारहरूको अभिनय रहेको यस फिल्मले नेपाललाई विश्व मञ्चमा चिनाउन थप योगदान दिएको छ।
शाम्बाला’ले नेपाली समाजको विविधता र परम्परागत जीवनशैलीलाई सजीव रूपमा चित्रण गरेको छ। यसले नेपालका हिमाली भेगको संस्कृति र जनजीवनलाई विश्वसामु पुर्याउने माध्यम बनेर देशको पहिचानमा थप योगदान पुर्याएको छ।
यो उपलब्धिले नेपाली फिल्म उद्योगलाई थप हौसला मिलाउनुका साथै अन्तर्राष्ट्रिय मञ्चमा नेपाली सिनेमा प्रस्तुत गर्नका लागि मार्गप्रशस्त गरेको छ।
