हङकङमा जारी हङकङ सिक्सेस क्रिकेट प्रतियोगितामा नेपालले शुक्रबार पहिलो खेलमै इंग्ल्यान्डमाथि ऐतिहासिक जित हात पारेको छ। प्रतियोगितामा पहिलो पटक सहभागी हुँदै नेपालले तीन पटकको च्याम्पियन इंग्ल्यान्डलाई ६ विकेटले पराजित गरेको हो। नेपालका लागि कप्तान सन्दिप जोराको विष्फोटक ब्याटिङ निर्णायक बन्यो।
नेपालले दिएको ९८ रनको लक्ष्य ४.२ ओभरमै विना कुनै विकेट क्षति पूरा गर्यो। कप्तान जोराले मात्र १२ बलमा ५० रनको योगदान दिए, जसमा ३ चौका र ६ छक्का सामेल थिए। उनले अर्धशतक पूरा गरेपछि रिटायर्ड आउटको रुपमा पभेलियन फर्केका थिए। जोराको नेतृत्वमा टिमले शानदार सुरुआत गर्यो।
यस्तै, रासिद खानले पनि प्रभावशाली प्रदर्शन गरे। उनले ५ बलमा २ चौका र २ छक्काको मद्दतले २१ रन बनाएर अविजित रहे। लोकेश बमले ११ बल खेल्दै १ चौका र २ छक्कासहित २० रन बनाए। नेपालका ब्याटरहरूको आक्रामक प्रदर्शनले इंग्ल्यान्डका बलरहरूलाई दबाबमा राख्यो।
टस जितेर पहिले ब्याटिङ गरेको इंग्ल्यान्डले निर्धारित ५.५ ओभरमा ६ विकेट गुमाउँदै ९७ रन बनाएको थियो। इंग्ल्यान्डका कप्तान रवि बोपाराले सर्वाधिक ४९ रन बनाए, जसमा १ चौका र ७ छक्का सामेल थियो। यस्तै, समित पटेलले १७ बलमा ३ चौका र ३ छक्का प्रहार गरी ३९ रन बनाए। तर, अन्य ब्याटरले प्रभावशाली प्रदर्शन गर्न सकेनन्।
नेपालका बलरहरूले पनि उत्कृष्ट प्रदर्शन गरे। प्रतिश जिसीले २ ओभरमा १८ रन खर्चेर ३ विकेट लिएर इंग्ल्यान्डलाई चापमा राखे। रासिद खान, नारायण जोशी, र विवेक यादवले १-१ विकेट लिँदै नेपाललाई बलिङतर्फ मजबुत बनाएका थिए।
यो जितसँगै नेपालले हङकङ सिक्सेस क्रिकेटमा शानदार सुरुआत गरेको छ। नेपाली टिमको यस्तो उत्कृष्ट प्रदर्शनले आगामी खेलहरूमा थप सफलता हात पार्ने विश्वास दिलाएको छ।
