राष्ट्रपति रामचन्द्र पौडेलले पेरिस पारा ओलम्पिकका कास्य पदक विजेता पलेशा गोवर्धन र उनको टोलीलाई शीतल निवासमा सम्मानित गर्नुभयो।
कार्यक्रममा, राष्ट्रपति पौडेल र प्रथम महिला सविता पौडेलले पलेशालाई माला र दोसल्ला ओढाएर उनलाई विशेष सम्मान प्रदान गर्नुभयो। यस अवसरमा पलेशाका प्रशिक्षक कविराज नेगी लामालाई पनि बधाई र शुभकामना दिइयो।
राष्ट्रपति पौडेलले पलेशाको यो उपलब्धिलाई देशको शान उचाल्ने काम भएको भन्दै भविष्यमा स्वर्ण पदक जित्ने आशा राख्नु भएको बताउनुभयो। उहाँले पलेशालाई आगामी प्रतियोगितामा अझै उत्कृष्ट प्रदर्शन गर्न प्रोत्साहित गर्नुभयो।
सन्मान समारोहको क्रममा नेपाली सेनाको एक टुकडीले मंगलधुन बजाएर उपस्थित व्यक्तिहरूलाई स्वागत गर्यो। कार्यक्रमका अन्य प्रमुख अतिथिहरूमा युवा तथा खेलकुद मन्त्री तेजुलाल चौधरी, पलेशाका परिवारका सदस्यहरू र खेल संघका पदाधिकारीहरू समेत सहभागी थिए।
पलेशा गोवर्धनले पेरिस पारा ओलम्पिकमा तेक्वान्दोको के ४४ विधाअन्तर्गत महिला ५७ केजीमुनिको प्रतिस्पर्धामा सर्बियाकी खेलाडीलाई पराजित गर्दै कांस्य पदक जित्नुभएको हो।
