अष्ट्रेलियाका विभिन्न भागमा आगामी साता व्यापक वर्षा हुने पूर्वानुमान गरिएको छ। हिन्द महासागरबाट आएको उष्णकटिबन्धीय आर्द्रतासहितको ठूलो ‘नर्थवेस्ट क्लाउडब्यान्ड’ दक्षिण–पूर्वी अष्ट्रेलियातर्फ सर्दै जाँदा केही क्षेत्रमा उल्लेख्य वर्षा हुन सक्ने मौसमसम्बन्धी पूर्वानुमानले देखाएको छ।
Weatherzone का अनुसार दक्षिण अष्ट्रेलिया, भिक्टोरिया, न्यू साउथ वेल्स, ACT र तास्मानियाका केही क्षेत्रमा ४० देखि ६० मिलिमिटरसम्म वर्षा हुन सक्नेछ। केही स्थानमा अर्को आइतबारसम्म जम्मा वर्षा ६० देखि ८० मिलिमिटरसम्म पुग्न सक्ने सम्भावना छ।
यस सप्ताहन्तमा केन्द्रीय अष्ट्रेलियाका केही क्षेत्रमा पनि वर्षा सुरु हुने अनुमान छ। माथिल्लो वायुमण्डलमा रहेको सुस्त गतिमा अघि बढिरहेको मौसमी प्रणाली र समुद्रबाट आइरहेको आर्द्रताले अर्को ठूलो क्लाउडब्यान्ड विकास गर्न सक्ने जनाइएको छ।
समुद्री सतह सामान्यभन्दा तातो रहेकाले वायुमण्डलमा ठूलो मात्रामा आर्द्रता प्रवेश गरिरहेको र त्यसले वर्षाको मात्रा बढाउन सक्ने मौसमविद्हरूको अनुमान छ। वर्षाको प्रभाव आगामी साताको उत्तरार्धसम्म जारी रहन सक्ने बताइएको छ।
यसैबीच, अष्ट्रेलियामा जाडो मौसमको अन्तिम केही साता चिसो रहने क्रम जारी छ। सिड्नी र मेलबर्नमा शनिबार अधिकतम तापक्रम करिब १४ डिग्री सेल्सियस रहने अनुमान गरिएको छ भने क्यानबेरा र होबार्टमा अधिकतम तापक्रम करिब ८ डिग्री सेल्सियस आसपास रहने पूर्वानुमान छ।
अर्कोतर्फ, यस वर्ष अष्ट्रेलियाको हिमपात सिजन औसतभन्दा कमजोर देखिएको छ। NSW को Spencers Creek मा पछिल्लो मापनअनुसार हिमको गहिराइ ९४.५ सेन्टिमिटर पुगे पनि यो सामान्य मध्य-सिजन औसतभन्दा कम रहेको जनाइएको छ।
