अष्ट्रेलियाका विश्वविद्यालयहरूलाई विश्वका ठूला कम्पनीहरूले रोजगारीका हिसाबले कसरी मूल्याङ्कन गर्छन् भन्ने प्रतिवेदन Global University Employability Ranking 2025 सार्वजनिक भएको छ। यसमा अष्ट्रेलियन नेशनल युनिभर्सिटी (ANU) अष्ट्रेलियाभित्र पहिलो स्थानमा उभिएको छ।
मानव संसाधन परामर्श संस्था Emerging द्वारा डिजाइन गरिएको र Times Higher Education मा मात्र प्रकाशित यो सूचीले कुन विश्वविद्यालयले विद्यार्थीलाई रोजगारीका लागि उत्कृष्ट रूपमा तयार पारिरहेको छ भन्ने देखाउँछ। यसपटक अष्ट्रेलियाका नौ विश्वविद्यालय विश्व सूचीमा पर्न सफल भएका छन्।
अष्ट्रेलियाका शीर्ष तीन विश्वविद्यालय
१. अष्ट्रेलियन नेशनल युनिभर्सिटी (ANU) – क्यानबेरास्थित ANU ले विद्यार्थीलाई रोजगारीमुखी बनाउन विभिन्न कार्यक्रम सञ्चालन गरेको छ। करियर कन्सल्टेन्टसँग हप्तामा तीन पटक “ड्रप-इन च्याट” गर्न सकिन्छ। साथै, ANU CareerHub नामक अनलाइन प्लेटफर्ममार्फत रोजगारी विज्ञापन, स्रोत सामग्री र अवसर पाउन सकिन्छ। नियमित करियर फेयरले विद्यार्थीलाई आफ्ना क्षेत्रमा काम गर्ने सम्भावित नियोक्तासँग प्रत्यक्ष भेट्ने अवसर दिन्छ।
२. युनिभर्सिटी अफ मेलबर्न – मेलबर्न विश्वविद्यालयले Mentoring Programme सञ्चालन गर्दै विद्यार्थीलाई पूर्व विद्यार्थी (Alumni) सँग जोडीदिन्छ, जसले करियर निर्णयमा मार्गदर्शन गर्छन्। यसबाहेक, संकाय-विशेष स्रोतहरू, आत्म-मूल्याङ्कन परीक्षण र करियर सल्लाहमार्फत विद्यार्थीलाई आफ्नो भविष्य पहिचान गर्न सहयोग गर्छ।
३. युनिभर्सिटी अफ सिड्नी – सिड्नी विश्वविद्यालयले कानून, इन्जिनियरिङ, सूचना प्रविधि (IT) र इन्भेस्टमेन्ट बैंकिङ जस्ता विषय-विशेष करियर फेयर आयोजना गर्छ। आफ्नै व्यवसाय सुरु गर्न चाहने विद्यार्थीका लागि “स्टार्ट-अप करियर फेयर” पनि हुन्छ। यस विश्वविद्यालयका स्नातकमध्ये छ जना अष्ट्रेलियाली प्रधानमन्त्री, पाँच नोबेल विजेता, २४ जना सर्वोच्च अदालतका न्यायाधीश र २४ जना रोड्स स्कलर रहेका छन्।
अष्ट्रेलियाका शीर्ष रोजगारीयोग्य विश्वविद्यालयहरूको सूची २०२५
- ANU (क्यानबेरा) – विश्व रैंक ३०
- युनिभर्सिटी अफ मेलबर्न (मेलबर्न) – विश्व रैंक ४४
- युनिभर्सिटी अफ सिड्नी (सिड्नी) – विश्व रैंक ६२
- युनिभर्सिटी अफ क्वीन्सल्याण्ड (ब्रिस्बेन) – विश्व रैंक ९५
- UNSW सिड्नी (सिड्नी) – विश्व रैंक १०७
- मोनाश विश्वविद्यालय (मेलबर्न) – विश्व रैंक १०८
- युनिभर्सिटी अफ टेक्नोलोजी सिड्नी (UTS) – विश्व रैंक १५७
- म्याक्वेरी विश्वविद्यालय (सिड्नी) – विश्व रैंक १९०
- क्वीन्सल्याण्ड युनिभर्सिटी अफ टेक्नोलोजी (ब्रिस्बेन) – विश्व रैंक २०१
यसपटकको सूचीले देखाएको छ कि अष्ट्रेलियाका विश्वविद्यालयहरू शैक्षिक गुणस्तरमा मात्रै नभई आफ्ना स्नातकहरूलाई प्रतिस्पर्धात्मक रोजगारी बजारमा सहज प्रवेशका लागि आवश्यक दक्षता दिन पनि विशेष पहल गरिरहेका छन्।
