स्पेनमा संयुक्त राष्ट्रसंघीय सम्मेलनको नाममा नेपाली नागरिकहरूलाई लैजाने क्रममा मानव तस्करीको आशंकापछि केन्द्रीय अनुसन्धान ब्युरो (CIB) ले छानबिन प्रक्रिया अघि बढाएको छ। प्रहरी प्रधान कार्यालयको निर्देशनमा एसएसपी होविन्द्र बोगटीको नेतृत्वमा छानबिन समिति गठन गरिएको हो।
एसएसपी बोगटीका अनुसार समितिमा मानव बेचबिखन अनुसन्धान ब्युरोका अनुसन्धान अधिकृतहरू पनि समावेश छन्। समितिले घटनाबारे छिटोभन्दा छिटो विस्तृत अनुसन्धान सम्पन्न गरी प्रतिवेदन प्रहरी प्रधान कार्यालयमा बुझाउने जनाएको छ।
गृहमन्त्रालयको बैठकमा औपचारिक निर्णय
यस विषयले औपचारिक रूप लिँदा सोमबार गृहमन्त्री रमेश लेखकको अध्यक्षतामा भएको उच्चस्तरीय बैठकमा छानबिन समिति गठनको प्रस्ताव अघि सारिएको थियो। बैठकमा स्पेनमा भएको भनिएको शंकास्पद गतिविधिबारे प्रारम्भिक तथ्याङ्क र प्रमाण प्रस्तुत गरिएपछि समितिले अनुसन्धान थालनी गर्ने सहमति जुटाइएको हो।
प्रधानमन्त्री नेतृत्वको टोली र अस्वाभाविक यात्रु चाप
१४ असारमा प्रधानमन्त्री केपी शर्मा ओलीको नेतृत्वमा २१ सदस्यीय सरकारी टोली स्पेनको सेभियामा आयोजित चौथो ‘International Conference on Financing for Development of United Nations’ कार्यक्रममा सहभागी हुन प्रस्थान गरेको थियो। सरकारी टोली २० असारमा नेपाल फर्किएको थियो।
तर, सोही अवधिमा थप ८२ जना नेपाली नागरिकहरू स्पेन पुगेका थिए भने अरू ५५ जना त्रिभुवन विमानस्थलबाटै रोकिएका थिए। प्रारम्भिक अनुसन्धानका आधारमा आशंका गरिँदैछ कि ‘सरकारी संयन्त्रको आडमा संगठित गिरोहले युरोप छिर्ने योजनासहित मानिसहरूलाई स्पेन पुर्याएको’ हुनसक्छ।
गिरोहमार्फत अवैध रुपमा युरोप छिर्ने प्रयास?
स्रोतका अनुसार, स्पेन पुर्याएर त्यसैलाई आधार बनाएर युरोपका अन्य देशहरू, विशेषतः पोर्चुगलतर्फ प्रवेश गराउने र त्यसबापत गिरोहले व्यक्तिबाट लाखौं रुपैयाँ असुल्ने गरेको विवरण बाहिर आएको छ। यस घटनाले राज्य संयन्त्रको दुरुपयोग र संगठित मानव तस्करीको गम्भीर संकेत गरेको भन्दै व्यापक सार्वजनिक चासो पैदा भएको छ।
मानव तस्करीजस्तो गम्भीर अपराधमा सरकारी मञ्च र भ्रमणलाई माध्यम बनाएको आशंका गम्भीर विषय हो। अनुसन्धानको निष्कर्षले यथार्थ सार्वजनिक गराउने अपेक्षा गरिँदैछ। छानबिन समितिले तथ्यमा आधारित निष्कर्ष सार्वजनिक गर्ने प्रतिबद्धता जनाएसँगै पीडितका लागि न्याय र दोषीमाथि कारबाहीको बाटो खुल्ने आशा गरिएको छ।
प्रहरीले नागरिकहरूलाई यदि यस्ता घटनामा संलग्न वा पीडित भएको जानकारी भएमा सहयोग गर्न आग्रह गरेको छ।
