पारदर्शिता, सहभागिता र दीर्घकालीन योजना प्रमुख एजेन्डा
पर्थ — गैरआवासीय नेपाली संघ (NRNA) अष्ट्रेलियाको आगामी कार्यकाल 2025–2027 का लागि पश्चिम अष्ट्रेलियाको राज्य संयोजक पदमा हरिबंश संजेल (सुमन)ले आफ्नो उम्मेदवारी औपचारिक रूपमा घोषणा गरेका छन्। सामाजिक सञ्जालमार्फत सार्वजनिक अभिव्यक्ति जारी गर्दै संजेलले विगतको अनुभव, समुदायप्रतिको प्रतिबद्धता र युवाबाट प्राप्त प्रेरणाको आधारमा आफूले यो उम्मेदवारी घोषणा गरेको स्पष्ट पारेका छन्।
उनका अनुसार यो उम्मेदवारी केवल व्यक्तिगत आकांक्षा नभई सम्पूर्ण पश्चिम अष्ट्रेलियावासी नेपाली समुदायप्रतिको उत्तरदायित्वको निरन्तरता हो। उनले उल्लेख गरेका छन् कि एनआरएन अभियान एक साझा अभियान हो जसले विश्वभर छरिएर रहेका नेपालीहरूलाई एकताबद्ध गर्दै, नेपाली पहिचान, संस्कृति र सहभागिता सशक्त बनाउने उद्देश्य राख्दछ।
हरिबंश संजेल विगतमा NRNA पश्चिम अष्ट्रेलियामा युवा सदस्य (2021–2023) र राज्य कोषाध्यक्ष (2023–2025) का रूपमा दुई कार्यकाल जिम्मेवारीमा रही काम गरिसकेका छन्। ती अवधिमा उनले युवाको सहभागिता, आर्थिक पारदर्शिता र संस्थागत सुदृढीकरणका क्षेत्रमा सकारात्मक पहलहरू गरेका थिए। संस्थागत प्रक्रियामा उनी सक्रिय रहँदै आएको र सम्पूर्ण कार्यकालभर जवाफदेही नेतृत्वको अभ्यास गरेको उनको भनाइ छ।
उम्मेदवारीसँगै उनले आगामी कार्यकालका लागि प्रस्तुत गरेका प्राथमिकता र योजनाहरूमा सामुदायिक एकता, सामाजिक सहयोग, महिला तथा युवा सशक्तीकरण, नेपाली भाषा र संस्कृतिको संरक्षण, खेलकुदद्वारा सम्पर्क विस्तार, व्यवसाय प्रवर्द्धन, मन्दिर तथा सामुदायिक केन्द्रहरूसँगको सहकार्य, र संस्थागत पारदर्शिता जस्ता विषयहरू समावेश छन्। यी एजेन्डाहरू समुदायको लामो समयदेखिको आवश्यकता र सुझावको आधारमा तयार पारिएको संजेलको दाबी छ।
उनले भनेका छन्, “NRNA एउटा संस्था मात्र होइन, यसले प्रवासी नेपालीहरूलाई विश्वभर समेट्ने, आवाज दिने र पहिचान जोगाउने साझा थलो हो। आगामी कार्यकालमा हामी दीर्घकालीन योजना बनाउँदै, सबै वर्ग, समुदाय र पुस्तालाई प्रतिनिधित्व गर्ने नेतृत्व प्रस्तुत गर्नेछौं।”
संजेलले हालसम्म पश्चिम अष्ट्रेलियामा २४०० भन्दा बढी सदस्यले सक्रिय सहभागिता जनाइसकेको उल्लेख गर्दै सम्पूर्ण समुदायप्रति आभार व्यक्त गरेका छन्। आगामी २६ जुलाई २०२५ मा हुने निर्वाचनलाई लक्षित गर्दै उनले सबै मतदातालाई आफ्नो सल्लाह, सुझाव, विश्वास र साथका साथ समर्थन गर्न आग्रह गरेका छन्।
उनका अनुसार, “यो अभियान केवल पद प्राप्तिको दौड होइन, बरु समग्र नेपाली डायस्पोराको उन्नति र एकता सुनिश्चित गर्ने साझा यात्रा हो, जसमा म तपाईहरूको साथ र सहभागिता अपेक्षा गर्दछु।”
📞 सम्पर्क जानकारी:
हरिबंश संजेल (सुमन)
उम्मेदवार – राज्य संयोजक
NRNA Western Australia (2025–2027)
मोबाइल: 0405 880 730
