बेइजिङ — चीनको दक्षिणपश्चिमी क्षेत्रमा आएको अविरल वर्षा र बाढीका कारण ८० हजारभन्दा बढी मानिस विस्थापित भएका छन्। भत्किएको पुलको छेउमा अड्किएका एक ट्रक चालकलाई नाटकीय रूपमा उद्धार गरिएको दृश्यसमेत सार्वजनिक भएको छ।
चीन हाल चरम मौसमी अवस्थाको सामना गरिरहेको छ। एकातिर अत्यधिक गर्मीले देशको ठूलो भूभाग तातिरहेको छ भने अर्कोतिर, बाढी र आँधीसहितको वर्षाले देशका विभिन्न भागमा ठूलो मानवीय र भौतिक क्षति पु¥याइरहेको छ।
गुइझोउमा आपतकालीन स्थानान्तरण
गुइझोउ प्रान्तको रोङजियाङ काउन्टी विशेष प्रभावित भएको छ। सरकारी समाचार एजेन्सी सिन्ह्वा (Xinhua) का अनुसार, मङ्गलबार दिउँसोसम्म ८०,९०० जना नागरिकलाई सुरक्षित स्थानमा सारिएको छ। बाढीले गाउँहरू, सडकहरू, र सार्वजनिक संरचनाहरू डुबानमा पारेको जनाइएको छ।
सिन्ह्वाको रिपोर्टअनुसार, रोङजियाङको एक फुटबल मैदान तीन मिटर गहिरो पानीमुनि डुबेको छ। यसैबीच, राज्य प्रसारण संस्था सीसीटीभी (CCTV) ले सार्वजनिक गरेको दृश्यमा, पहाडी इलाकाका बस्तीहरू जलमग्न अवस्थामा देखिन्छन् भने एउटा पुल पूर्ण रूपमा भत्किएको छ।
उद्धार कार्य जारी
बाढी प्रभावित क्षेत्रमा उद्धार टोली परिचालन गरिएको छ। आपतकालीन सेवाहरू, सुरक्षाकर्मी र स्वयंसेवकहरूले संयुक्त रूपमा प्रभावित नागरिकहरूको उद्धार र स्थानान्तरण कार्य गरिरहेका छन्। स्थानीय सरकारद्वारा अस्थायी आश्रय स्थलहरू स्थापना गरिएको जनाइएको छ।
चरम मौसम चिन्ताको विषय
चीनको मौसम विभागका अनुसार, यो चरम वर्षा प्रणालीले अझै केही दिनसम्म गुइझोउसहितका अन्य दक्षिणी प्रान्तहरूलाई असर पार्न सक्ने सम्भावना रहेको छ। हालैका वर्षहरूमा जलवायु परिवर्तनका असरहरू तीव्ररूपमा देखिँदै गएकाले मौसमजन्य विपद् व्यवस्थापनमा चुनौती थपिएको चिनियाँ अधिकारीहरूले बताएका छन्।
