मुलुकभर परेको अविरल वर्षाका कारण आएको बाढीपहिरोले देशभरका सात प्रमुख राजमार्ग पूर्णरूपमा अवरुद्ध भएका छन्। प्रहरी प्रधान कार्यालयका अनुसार, सखुवासभाको भोटखोला गाउँपालिकास्थित कोशी राजमार्ग, रसुवाको गोसाइँकुण्ड गाउँपालिकास्थित नेपाल–चीन नाका जोड्ने पुल, रसुवाकै पासाङ ल्हामु राजमार्ग, सिन्धुपाल्चोकको भोटेकोशी गाउँपालिकास्थित अरनिको राजमार्ग पूर्णरूपमा अवरुद्ध छन्। त्यस्तै, बाग्लुङ नगरपालिकास्थित कालिगण्डकी करिडोर, रोल्पाको परिवर्तन गाउँपालिकास्थित घोराही–रुकुम सहिद राजमार्ग र रुकुम पश्चिमको आठबिसकोट नगरपालिकास्थित जाजरकोट–डोल्पा भेरी करिडोर सडक पनि पूर्णरूपमा रोकिएका छन्।
यसैगरी, केही सडक खण्ड आंशिक रूपमा मात्र सञ्चालनमा रहेका छन्। प्रहरीका अनुसार, काठमाडौँको टोखाबाट नुवाकोट जाने सडकखण्ड, नवलपरासी पूर्वको गैँडाकोट नगरपालिकास्थित कालिगण्डकी करिडोर, मुस्ताङको थासाङ गाउँपालिकास्थित बेनी–जोमसोम सडक, तनहुँको बन्दीपुर गाउँपालिकास्थित पृथ्वी राजमार्ग र रोल्पाको परिवर्तन गाउँपालिकास्थित सहिद राजमार्ग एकतर्फी रूपमा सञ्चालनमा आएका छन्।
राजमार्ग अवरुद्ध हुँदा लामो दूरीका सवारी साधन बीच बाटोमै रोकिएका छन् भने यात्रुहरूलाई गन्तव्यमा पुग्न कठिनाइ भइरहेको छ। यातायात सेवा ठप्प भएपछि खाद्यान्न तथा दैनिक उपभोग्य वस्तुको ढुवानीमा समेत समस्या देखिएको छ। स्थानीय प्रशासन र सम्बन्धित निकायहरूले सडक मर्मत र अवरोध हटाउने कार्य सुरु गरिसके पनि वर्षा निरन्तर भएकाले तत्काल सहज यातायात सम्भव हुने देखिएको छैन।
