प्रकाश सपुतको निर्देशनमा बनेको फिल्म ‘वसन्त’ को पहिलो गीत सार्वजनिक गरिएको छ। सार्वजनिक गीत ‘साँझ पर्यो झमक्क’ मा प्रकाश स्वयं र शान्ति श्री परियारको स्वर छ। गीतको शब्द र सङ्गीत पनि प्रकाश स्वयंको हो भने एरेन्जको काम सुदीप सागरले गरेका हुन्।
भिडियोमा फिल्मका मुख्य कलाकार प्रकाश र स्वस्तिमा खड्काको साथमा अन्य कलाकारहरू प्रभात पाल ठकुरी, खड्गबहादुर पुन, शिभान्सी श्रीलाई पनि देखाइएको छ। भिडियोलाई मौसम हिमालीले कोरियोग्राफी गरेका हुन्।
गलबन्दी प्रोडक्सनबाट बनेको वसन्तको कथा र सङ्गीत पनि प्रकाशकै हो। फिल्मको निर्मातामा मोहन विश्वकर्मा र बिन्दु बोहोरा छन्। कार्यकारी निर्मातामा बिरेन्द्र नारायण श्रेष्ठ, अनुरोध भट्टराई र नाना थकाली छन्। मुख्य सह–निर्देशन सुनिल विकको छ। प्रोजेक्ट हेड दिल शिरीष हुन्। फिल्म चैत २२ गते (चैते दसैँ) मा रिलिज हुनेछ।
