न्यूजिल्यान्डका क्रिकेटर जिमी निशमले नेपालमा जस्तो क्रिकेटप्रतिको क्रेज र आतिथ्यता संसारमा कतै नपाएको बताएका छन्। नेपाल प्रिमियर लिग (एनपीएल) अन्तर्गत सुदूरपश्चिम रोयल्सविरुद्धको खेलपछि उनले नेपाली दर्शकको लगाव र व्यवहारको प्रशंसा गरे। स्टार स्पोर्ट्ससँगको अन्तर्वार्तामा उनले त्रिवि क्रिकेट मैदान उत्कृष्ट रहेको र समर्थकहरूको समर्थन अद्वितीय भएको बताएका छन् ।
मैले संसारका धेरै देशमा गएर क्रिकेट खेलेँ तर नेपालमा जस्तो क्रिकेटप्रति लगाव र उच्च सङ्ख्यामा समर्थक कतै पनि भेटेको छैन’ निशमले भने ।
खेल जितेपछि मैदान परिक्रमा गर्दा पाएको सम्मानको तारिफ गर्दै उनले भनेका छन्, ‘खेल जितेपछि हामीले समर्थकलाई धन्यवाद दिन मैदान परिक्रमा गरेका थियौँ, त्यस समयमा देखिएको दृष्य र समर्थकले गरेको व्यवहार संसारका कुनै पनि ठाउँमा भन्दा राम्रो लाग्यो ।’
साथै, निशमले नेपाली होटलको आतिथ्यतालाई विशेष मानेका छन् र एनपीएल ११ महिनापछि फेरि हुनेमा विश्वास व्यक्त गरेका छन्।
