नेपाली मूलका युवा विनोद पौडेलले अस्ट्रेलियाको संघीय राजनीतिमा नयाँ अवसर पाएका छन्। प्रमुख प्रतिपक्ष दल लिबरल पार्टीले उनलाई २०२५ मा हुने संघीय निर्वाचनका लागि सिड्नीको माकार्थर क्षेत्रबाट सांसदको उम्मेदवार बनाएको छ। यसअघि २०२२ को निर्वाचनमा पश्चिमी सिड्नीबाट प्रतिस्पर्धा गरेका पौडेल सत्तारूढ लेबर पार्टीका उम्मेदवारसँग थोरै मतले पराजित भएका थिए।
पौडेलले आफ्नो पराजयलाई नयाँ प्रेरणा बनाउँदै लिबरल पार्टीभित्र आफूलाई स्थापित गर्न सफल भएका छन्। उनको उम्मेदवारीले माकार्थर क्षेत्रमा नेपाली समुदायको मात्र होइन, सम्पूर्ण बहुसांस्कृतिक समुदायको प्रतिनिधित्व गर्ने अपेक्षा गरिएको छ।
अस्ट्रेलियामा नेपालीहरूको जनसंख्या तीव्र गतिमा बढिरहेको छ। यो परिप्रेक्ष्यमा, नेपाली मूलका उम्मेदवारहरूलाई प्रतिनिधित्व दिन अस्ट्रेलियाका ठूला राजनीतिक दलहरू बढी आकर्षित भएका देखिन्छन्। माकार्थर क्षेत्रमा पनि नेपालीहरूको उल्लेख्य उपस्थिति रहेको छ, जसले यस क्षेत्रमा पौडेलको उम्मेदवारीलाई थप बलियो बनाएको छ।
यसअघि, लिबरल पार्टीकै तर्फबाट नेपाली युवा पीजे श्रेष्ठले सांसदको टिकट पाएर प्रतिस्पर्धा गरेका थिए। तर, उनी चर्चित लेबर उम्मेदवार लिन्डा बर्नीसँग केही हजार मतले पराजित भएका थिए। यद्यपि, यी प्रयासहरूले नेपाली मूलका नेताहरूलाई अस्ट्रेलियाली राजनीतिमा मार्गप्रशस्त गरेको छ।
स्थानीय राजनीतिमा पनि नेपाली महिलाहरूले इतिहास बनाउँदै आएका छन्। भद्रा वाइबा र स्वीकृति भट्टजस्ता नेपाली मूलका महिलाहरूले काउन्सिलमा जित हासिल गर्दै नेपाली समुदायको पहिचान बलियो बनाएका छन्।
