दक्षिण भारतीय चलचित्र उद्योगका चर्चित अभिनेता नागा चैतन्य र अभिनेत्री शोभिता धुलिपाला छिट्टै विवाह बन्धनमा बाँधिने भएका छन्। हैदराबादको अन्नपूर्ण स्टुडियोमा डिसेम्बर ४ मा उनीहरूको विवाह समारोह आयोजना हुनेछ।
नागा चैतन्य र शोभिताले आफ्नो विवाहका लागि अन्नपूर्ण स्टुडियोलाई विशेष स्थानका रूपमा चयन गरेका छन्। इन्डिया टुडेका अनुसार यो स्टुडियो नागा चैतन्यका हजुरबुवा, प्रसिद्ध अभिनेता अक्किनेनी नागेश्वर रावले स्थापना गरेका थिए। पारिवारिक सम्पदाको सम्मान गर्न र हजुरबुवाको योगदानलाई स्मरण गर्न यो ठाउँमा विवाह गर्ने निर्णय गरिएको हो।
नागा चैतन्यका लागि यो स्टुडियो व्यक्तिगत रूपमा निकै महत्वपूर्ण रहेको बताइन्छ। परिवारसँग सम्बन्धित महत्त्वपूर्ण क्षणहरू यही स्थानमा आयोजना गर्न चाहने परम्परालाई उनले निरन्तरता दिने उद्देश्यले यो निर्णय गरेका हुन्।शोभिता धुलिपालाले सामाजिक सञ्जालमार्फत विवाहअघिको समारोहका केही झलकहरू पनि सार्वजनिक गरेकी छिन्। ‘पसुप्पु दञ्चदम’ समारोहका तस्बिरहरूमा उनी सुन्तलाको रङको साडी र हरियो बोर्डरमा सजिएको पोशाकमा देखिएकी छिन्। अर्को तस्बिरमा उनी बेसार कुटिरहेको देख्न सकिन्छ भने कमलको फूल समातेर बसिरहेको तस्वीर पनि बाहिर आएको छ।परिवार र नजिकका साथीभाइहरूको उपस्थितिमा विवाहको तयारी तीव्र रूपमा अगाडि बढिरहेको छ। शोभिताको सार्वजनिक तस्बिरहरूले समारोहको भव्यताको झलक दिन्छन्। यो विवाह दक्षिण भारतीय चलचित्र उद्योगका लागि विशेष महत्त्वको हुनेछ।
