काठमाडौं । पूर्वराजा ज्ञानेन्द्र शाहले नेपाली जनताको वर्तमान अवस्था र भविष्यप्रति चिन्ता व्यक्त गरेका छन् । विजया दशमीको शुभकामना सन्देश जारी गर्दै, उनले नेपालीहरूको आकांक्षाहरू अझै पूरा नभएको भन्दै आफ्नो बेचैनी बढेको बताएका छन् । शाहले नेपालीहरूले बाह्रै महिना खुसी र सुखमा बिताउनु पर्ने आफ्नो चाहना रहेको तर त्यसको पूर्ति नहुनु दुःखद भएको उल्लेख गरेका छन् ।
शुभकामना सन्देशमा उनले भनेका छन्, “दसैंको बेला मात्रै होइन, हरेक दिन नेपालीहरूले हर्ष र समृद्धि अनुभव गर्न पाउनु पर्ने हो । तर दुई दशक बितिसक्दा पनि जनताको आकांक्षा पूरा हुन नसक्दा हामीलाई खिन्नता भएको छ । हामीले आफ्नो पारिवारिक जिम्मेवारी पूरा गर्दै, जनताको हितका लागि नारायणहिटी दरबार छोडेका थियौं, तर देशको समृद्धिमा अपेक्षित प्रगति नभएको देख्दा मन भारी भएको छ ।”
शाहले हाल देश गम्भीर समस्याहरूको सामना गरिरहेको बताउँदै, निरन्तर बढिरहेको परनिर्भरता र ऋणभारले देशलाई कमजोर बनाएको औंल्याएका छन् । उनले विशेष रूपमा युवाहरूको विदेश पलायनको विषयमा चिन्ता व्यक्त गर्दै भने, “देशका गाउँबस्ती र शहरहरू क्रमशः युवाशक्ति विहीन बन्दै गइरहेका छन् । युवालाई स्वदेशमै अवसर र रोजगारी सिर्जना गर्न नसक्दा आज देशले संकट भोग्दैछ ।”
उनी युवाहरूको विदेश जाने बाध्यताले न केवल खेतबारी बाँझो परेको, तर हरेक बाबुआमाको मनमा पीडा भएको पनि बताएका छन् । शाहले मुलुकमा शान्ति, स्थायित्व र समृद्धिका लागि सधैं प्रयत्नशील रहँदै आएको बताएका छन् ।
पूर्वराजाले भनेका छन्, “हामी सधैं देशको अखण्डता, सार्वभौमिकता र सामाजिक सद्भावलाई जोगाउने पक्षमा छौं । बाह्य शक्तिहरूको दबाब र दुष्प्रभावबाट देशलाई जोगाउन हामीले ध्यान दिनु आवश्यक छ, ताकि हाम्रो भूमि कुनै प्रकारको अशान्ति वा अस्थिरताको चपेटामा नपरोस् ।”
अन्त्यमा, उनले नेपाललाई शान्त राष्ट्रको रूपमा विश्वमा परिचित गराउनुपर्ने आफ्नो दीर्घकालीन सोच रहेको बताउँदै, यस दिशामा राष्ट्रिय संकल्प आवश्यक रहेकोमा जोड दिएका छन् ।
