गैरआवासीय नेपाली सङ्घ (एनआरएनए) ले हालैको लगातारको वर्षाका कारण देशभर आएको बाढी, पहिरो र डुबानबाट प्रभावित परिवारहरूलाई १ करोड रुपैयाँ सहयोग गर्ने भएको छ। आइतबार सम्पन्न भर्चुअल बैठकमा सङ्घले यो सहयोगको घोषणा गरेको हो।
सङ्घले यस आपतकालीन स्थितिमा आफ्नो दायित्व निर्वाह गर्दै पहिलो चरणमा राहतस्वरूप यो सहयोग रकम प्रदान गर्ने निर्णय गरेको छ। सहयोग वितरणलाई व्यवस्थित र प्रभावकारी बनाउन उच्चस्तरीय आर्थिक सहयोग सङ्कलन समिति गठन भएको छ।
बाढीबाट क्षतिग्रस्त भएका क्षेत्रहरूको अध्ययन गर्न समितिले स्थलगत निरीक्षण गरी क्षतिको यथार्थ जानकारी सङ्कलन गर्नेछ। राहत सामग्री र आर्थिक सहयोग वितरणको तयारीमा राष्ट्रिय समितिको सहकार्यमा एनआरएनएले सक्रिय भूमिका निर्वाह गर्दै छ, जसले प्रत्यक्ष रूपमा प्रभावित क्षेत्रहरूमा सहयोग पुर्याउनेछ।
सङ्घले हालसम्म काठमाडौँ, भक्तपुर, मकवानपुर, ललितपुर, काभ्रे, धादिङ, सिन्धुपाल्चोक, दोलखा, सिन्धुली, रामेछाप, नुवाकोट, पाँचथर, धनकुटा, उदयपुर, सोलुखुम्बु, इलाम, महोत्तरी, सप्तरी लगायतका जिल्लाहरूमा बाढी र पहिरोबाट प्रत्यक्ष प्रभावित नागरिकहरूलाई लक्षित गर्दै राहत अभियान सञ्चालन गर्ने योजना बनाएको छ।
यस निर्णयले बाढीपहिरोमा ज्यान गुमाएकाहरूलाई श्रद्धाञ्जलि र शोकसन्तप्त परिवारजनप्रति समवेदना व्यक्त गर्दै, संकटको घडीमा सबै नेपालीले एक भएर साथ दिनुपर्ने सन्देश दिएको छ।
गैरआवासीय नेपाली समुदायले विपत्तिको समयमा देखाएको सहयोग भावना र नेपालसँगको गहिरो सम्बन्धले सबै नेपालीको मन छोएको छ। एनआरएनएको यो योगदानले देशभित्र र बाहिरका नेपालीबीचको ऐक्यबद्धतालाई अझ सुदृढ बनाउने विश्वास गरिएको छ।
