भारतका चर्चित पार्श्वगायक तथा संगीतकार सोनु निगम यसपटक क्रिसमसको अवसरमा नेपालमा एकल सांगीतिक प्रस्तुति दिने भएका छन्। पुस १० (डिसेम्बर २५) का दिन काठमाडौंमा उनको कन्सर्ट हुने तय भएको छ।
यस इभेन्टको आयोजना नेपाल टचले गर्ने भएको छ। यसअघि विराटनगरमा नेपथ्यको कन्सर्ट सफलतापूर्वक सम्पन्न गरेको यो इभेन्ट कम्पनीले निगमलाई नेपालमा ल्याउन लागेको हो। नेपाल टचले अस्ट्रेलियामा ‘भ्वाइस अफ नेपाल’ र ‘नेपाल आइडल’ जस्ता लोकप्रिय कार्यक्रमहरूसहित थुप्रै सांगीतिक कार्यक्रम गरिसकेको छ।
सोनु निगमले यसअघि सन् २००४ मा झरना बज्राचार्यसँग ‘लभ इन नेपाल’ फिल्ममा अभिनय गरेका थिए। त्यसयता दुई दशकपछि उनी फेरि नेपालमा सांगीतिक प्रस्तुति दिन लागेका हुन्। उनले आफ्नो ब्याण्डसहित सोलो परफर्मेन्स गर्नेछन्।
नेपाल टचका अनुसार कन्सर्टको टिकट बुकिङ छिट्टै खुल्ने तयारी भइरहेको छ।
