दीपाश्री निरौला निर्देशित लोकप्रिय नेपाली फिल्म ‘छक्कापञ्जा ५’ यस वर्षको दशैंको फूलपातीका दिन अस्ट्रेलियामा पनि रिलिज हुने भएको छ। अस्ट्रेलियाका विभिन्न सहरका ५० भन्दा बढी सिनेमा हलमा यो फिल्म प्रदर्शन गरिनेछ, प्रदर्शक शीतल गिरीले जानकारी दिएका छन्।
पहिलेका सिरिजहरू हल भाडामा लिएर प्रदर्शन गरिँदै आएको भए पनि यसपटक फिल्मलाई अस्ट्रेलियामा नियमित रूपमा बक्स अफिसमार्फत रिलिज गरिने गिरीले बताए। उनले भने, “यहाँ रहेका नेपालीहरूको सहजता र सुझावलाई ध्यानमा राख्दै ‘छक्कापञ्जा ५’ को पनि बक्स अफिस रिलिज गर्न लागिएको हो।”
यो फिल्मको अस्ट्रेलियाली प्रदर्शन अधिकार रगडेल ब्वाइज, नमस्ते इन्टरटेनमेन्ट, र ग्रिस इन्टरटेनमेन्टले संयुक्त रूपमा खरिद गरेका छन्। आमा सरस्वती मुभिजको ब्यानरमा निर्माण भएको ‘छक्कापञ्जा ५’ मा दीपकराज गिरी, वर्षा सिवाकोटी, केदार घिमिरे ‘माग्ने बूढा’, र बुद्धि तामाङ लगायतका कलाकारहरूको मुख्य भूमिका रहेको छ।
