सिड्नी। सिड्नीस्थित अवर्न नेपाली समाजले आयोजना गरेको ‘तीज धमाका’ भव्य रुपमा सम्पन्न भएको छ। नेपाली सांस्कृतिक विविधता र मौलिकता झल्काउने यस कार्यक्रममा सिड्नीका नेपाली समुदायको उल्लेखनीय उपस्थिति रह्यो।
विशेष अतिथि तथा अभिभाषण
कार्यक्रममा एनआरएनए ओसेनिया क्षेत्रीय संयोजक दीनेस पोखरेल, एनआरएनए अष्ट्रेलियाका अध्यक्ष अनिल पोखरेल, कम्बरल्यान्ड काउन्सिलका काउन्सिलर एनभर यासर, ओबर्न प्रहरी एरिया कमाण्डका सुपरिन्टेन्डेन्ट रोबर्ट टोइन्टन, तथा बरउड काउन्सिलकी काउन्सिलर सुकृती भट्ट विशेष अतिथिका रूपमा उपस्थित थिए।
उहाँहरूले आफ्ना मन्तव्यमा विदेशमा पनि नेपाली कला–संस्कृतिको भव्य प्रस्तुति हुनु आफैँमा ठूलो उपलब्धि भएको बताउनुभएको थियो। साथै, यस्ता सांस्कृतिक कार्यक्रमहरूले नेपाली संस्कृतिको संरक्षण र प्रवर्द्धनमा महत्त्वपूर्ण योगदान पुर्याउने भन्दै आयोजक संस्थाप्रति धन्यवाद प्रकट गर्नुभयो ।
कला–संस्कृति र मनोरञ्जन
स्थानिय बालबालिकाले सामूहिक नृत्य प्रस्तुत गरेर कार्यक्रमलाई अझ आकर्षक बनाए। त्यस्तै, नेपालबाट आएका लोकप्रिय गायक रामजी खाँड र गायिका शान्ता रानी परियारले डेढ घण्टा लामो साँगीतिक प्रस्तुति दिए, जसले माहोललाई तिजको रंगीन उत्सवमा परिणत गर्यो।
सम्मान र विशेषता
कार्यक्रममा समाजका पूर्वअध्यक्ष जितेन्द्र श्रेष्ठ, असोक उप्रेती, र संरक्षकहरूलाई सम्मान तथा प्रमाणपत्र प्रदान गरियो। यसले समाजमा योगदान दिने व्यक्तिहरूप्रति कृतज्ञता प्रकट गरेको आयोजकहरूले जनाउनुभयो।
महिलाको उल्लेखनीय सहभागिता
एन्टा (NTA) का अध्यक्ष रञ्जित शाह, नारी निकुञ्ज एनएसडब्लुकी नवनिर्वाचित संयोजक आशा श्रेष्ठलगायत समुदायका सक्रिय दिदीबहिनीहरूको उल्लेखनीय उपस्थिति रहेको थियो। कार्यक्रमको सञ्चालन एनआरएनए एनएसडब्लुकी नवनिर्वाचित सदस्य अजिना कार्की र डोल्मा लामाले गर्नुभएको थियो।
आयोजकको प्रतिबद्धता
अवर्न नेपाली समाजका अध्यक्ष अरुण श्रेष्ठ र उपाध्यक्ष हेमन लामिछानेले अतिथि, कलाकार र सहभागीहरूलाई धन्यवाद ज्ञापन गर्दै समाजले आगामी दिनमा पनि नेपाली कला, संस्कृति र साहित्य उत्थानमा निरन्तर काम गर्ने प्रतिबद्धता व्यक्त गर्नुभयो।
