सिड्नी — अष्ट्रेलियाका वैज्ञानिकहरूले कोरोना भाइरसका विभिन्न भेरियन्टहरूविरुद्ध सुरक्षा प्रदान गर्नसक्ने नयाँ खोप विकास गरेको दाबी गरेका छन्।
सिड्नीस्थित सेन्टेनेरी इन्स्टिच्युट र सिड्नी विश्वविद्यालयका अनुसन्धानकर्ताहरूले मिलेर ‘CoVEXS5’ नामक खोप तयार पारेका हुन्, जसले ओमिक्रोन XBB.1.5 जस्ता अत्यधिक प्रतिरक्षा–उल्झन क्षमतायुक्त भेरियन्टसहित पाँच प्रकारका भेरियन्टहरू तथा SARS-CoV-2 सँग सम्बन्धित SARS-CoV-1 विरुद्ध पनि सुरक्षा दिने दाबी गरिएको छ।
प्रयोगशालामा गरिएको अध्ययनमा यो खोप लगाइएका मुसाहरूको फोक्सोमा भाइरसको मात्रा ९९.९ प्रतिशतसम्म घटेको पाइयो। यस खोपले उच्च स्तरको प्रतिरोधात्मक एन्टिबडी उत्पादन गर्नुका साथै शरीरको रोग प्रतिरोधी प्रणालीमा महत्वपूर्ण भूमिका खेल्ने ‘टी–कोशिका’ सक्रिय बनाउने पनि पुष्टि भएको छ।
“हामीले विभिन्न कोरोनाभाइरसका अंशहरूलाई संयोजन गरी यस्तो खोप तयार पारेका छौं, जसले शरीरलाई हाल र भविष्यमा आउने भाइरसका खतराहरूविरुद्ध लड्न तयार बनाउँछ,” सेन्टेनेरी इन्स्टिच्युट अन्तर्गतको इन्फेक्सन एन्ड इम्युनिटी केन्द्रका अनुसन्धानकर्ता डा. क्लाउडियो कौनोपासले भने।
CoVEXS5 खोपमा विशेष प्रकारको स्पाइक प्रोटिन प्रयोग गरिएको छ, जसमा विभिन्न भेरियन्टका प्रोटिन अंशहरूलाई एउटै संरचनामा गाभिएको छ। अनुसन्धानकर्ताहरूका अनुसार, यस संरचनाले शरीरको रोग प्रतिरोधात्मक प्रणालीलाई फरक–फरक प्रकारका भाइरसहरू चिन्न र तिनविरुद्ध प्रतिक्रिया जनाउन सघाउँछ।
“हामीले प्रयोगशालामा देखेको रोग प्रतिरोधात्मक प्रतिक्रिया बलियो र व्यापक दुवै किसिमको थियो,” सह–अनुसन्धानकर्ता एलिजाबेथ च्यानले भनिन्। “यो विधिबाट भविष्यमा पनि परिवर्तन हुँदै गएका भाइरसहरूविरुद्ध खोपहरूलाई प्रभावकारी बनाउने सम्भावना देखिन्छ।”
अनुसन्धान टोलीले अहिले यो खोपलाई थप परीक्षण र विकासको चरणमा अगाडि बढाउने तयारी गरिरहेको जनाएको छ।
