अष्ट्रेलियाको भिक्टोरिया राज्य अन्तर्गतको क्षेत्रीय सहर बेन्डिगो नजिक एक बुसवाकर (वनमा हिंड्न गएका व्यक्ति) लाई अपहरण गरी कुटपिट गरिएको घटनामा संलग्न रहेको आरोपमा चार जनाविरुद्ध आपराधिक अभियोग दायर गरिएको छ।
प्रहरीका अनुसार, २६ वर्षीय एक युवक जुन ९ तारिख दिउँसो करिब २:३० बजे Comet Street, Long Gully क्षेत्रको पार्कजस्तो जङ्गल क्षेत्रमा गम्भीर अवस्थामामा फेला परेका थिए। प्रारम्भिक अनुसन्धानपछि प्रहरीले खुलासा गरेको विवरणअनुसार, ती युवकलाई बलपूर्वक गाडीमा राखेर जंगलमा लगिएको र त्यहाँ उनीमाथि कुटपिट गरिएको थियो। त्यसपछि उनलाई Kangaroo Flat स्थित एउटा निजी आवासमा लगेर पुनः आक्रमण गरिएको आरोप प्रहरीले लगाएको छ।
घटनामा संलग्न भएको आशंकामा प्रहरीले ३६ वर्षीया महिला, ३१ वर्षीय पुरुष र ३५ वर्षीय पुरुषलाई पक्राउ गरेको छ। ती तीनै जनाविरुद्ध झुटो थुनावन्दी (False Imprisonment) र लापरवाहीपूर्वक चोट पुर्याउने (Recklessly Causing Injury) लगायतका अभियोग लगाइएको छ। उनीहरूलाई आउँदो सेप्टेम्बरमा बेन्डिगो म्याजिस्ट्रेट अदालतमा उपस्थित गराइनेछ।
यसै घटनासँग सम्बन्धित चौथो अभियुक्त २७ वर्षीय पुरुषलाई Caroline Springs मा रहेको उनको निवासबाट पक्राउ गरिएको हो। उनलाई अपहरण, झुटो थुनावन्दी, र सशस्त्र डकैती (Armed Robbery) को आरोपमा मुद्दा दायर गरिएको छ। उनी जुलाई १४ मा बेन्डिगो म्याजिस्ट्रेट अदालतमा उपस्थित गराइनेछन्।
प्रहरीले यो घटना गम्भीर प्रकृतिको भएको भन्दै, घटनाको पछाडिको कारण, संलग्न अन्य व्यक्तिहरूको सम्भावित भूमिका, र घटनास्थलहरूको विस्तृत अनुसन्धान जारी रहेको जनाएको छ।
पीडित युवकको स्वास्थ्य अवस्था प्रारम्भिकरूपमा अत्यन्तै गम्भीर रहेको जनाइएको थियो, यद्यपि पछिल्लो अवस्थाबारे आधिकारिक विवरण अझै आउन बाँकी छ।
सार्वजनिक सुरक्षा र समुदायप्रति समर्पित प्रहरी निकायले घटनासम्बन्धी थप जानकारी उपलब्ध भएमा Crime Stoppers वा सम्बन्धित प्रहरी कार्यालयमा सम्पर्क गर्न आम जनसमुदायलाई आह्वानसमेत गरेको छ।
