सन् २०२६ मा भारत र श्रीलंकाले संयुक्त रूपमा आयोजना गर्न लागेको आईसीसी टी–२० विश्वकपका लागि एसियाली तथा पूर्वी एसियाली क्षेत्रीय छनोट चरणको समूह विभाजन सार्वजनिक गरिएको छ। अन्तर्राष्ट्रिय क्रिकेट परिषद् (ICC) ले बिहीबार सार्वजनिक गरेको जानकारीअनुसार नेपाल समूह ‘बी’मा परेको छ र यस समूहमा नेपालले कुवेत र जापानसँग प्रतिस्पर्धा गर्नेछ।
कूल ९ सहभागी टोलीलाई तीनवटा समूहमा विभाजन गरिएको छ। समूह ‘ए’मा संयुक्त अरब इमिरेट्स (UAE), मलेसिया र कतार रहेका छन् भने समूह ‘सी’मा ओमान, पपुवा न्यू गिनी (PNG) र समोआ रहेका छन्। प्रत्येक समूहमा तीन टोली छन् र प्रतियोगिता सिंगल राउन्ड रोबिन (Round Robin) प्रणालीमा सञ्चालन हुनेछ, जसअनुसार हरेक टोलीले समूहभित्रका अन्य दुई टोलीसँग एक–एक खेल खेल्नेछ।
प्रत्येक समूहका शीर्ष दुई टोलीले ‘सुपर सिक्स’ चरणमा स्थान बनाउनेछन्। सुपर सिक्स चरणमा पुगेका टोलीहरूबीच पुनः प्रतिस्पर्धा गराइनेछ, जसबाट उत्कृष्ट तीन टोलीले आगामी वर्ष भारत र श्रीलंकामा संयुक्त रूपमा आयोजना हुने ICC Men’s T20 World Cup 2026 का लागि अन्तिम चरणमा प्रवेश पाउनेछन्।
नेपालका लागि यो छनोट चरण विशेष महत्वको छ। घरेलु स्तरमा उत्कृष्ट प्रदर्शन गरिरहेको नेपाली टिमले पछिल्ला केही महिनामा युवा खेलाडीहरूको राम्रो संयोजन र बलियो टोली निर्माण गरेको छ। मुख्य प्रशिक्षक मोंटी देसाई को रणनीतिक योजना, कप्तान रोहित पौडेल को नेतृत्व, र बलर तथा ब्याट्सम्यानहरूको सन्तुलित योगदानले नेपालको टिमले यसपटक टी–२० विश्वकप खेल्ने अपेक्षा बढाएको छ।
प्रतियोगिता अक्टोबर ८ देखि १७ सम्म ओमानमा आयोजना हुने तय गरिएको छ। नेपाली टिमले छनोट प्रतियोगिताको तयारीका लागि प्रशिक्षण शिविर सञ्चालन गरिरहेको छ भने तयारी खेलहरूको कार्यक्रम पनि तय हुने अपेक्षा गरिएको छ।
नेपालले यसअघि सन् २०१४ मा पहिलोपटक टी–२० विश्वकपमा भाग लिएको थियो, जुन बंगलादेशमा आयोजना गरिएको थियो। त्यसपछिका संस्करणहरूमा नेपाल विश्वकपको मुख्य चरणमा स्थान बनाउन चुकेको थियो। यसपटक पुनः विश्वकपको मञ्चमा फर्किने अपेक्षासहित नेपाली टिम यो छनोट चरणमा मैदान उत्रनेछ।
नेपाल क्रिकेट सङ्घ (CAN) का अनुसार, टिमको अन्तिम चयन केही साता भित्रै गरिनेछ भने टोलीलाई प्रस्थान अघि विदाई तथा शुभकामना कार्यक्रम आयोजना गरिने तयारी छ।
यस पटकको छनोट चरणमा प्रतिस्पर्धा गर्ने टोलीहरू प्राय: अनुभव र क्षमताको हिसाबले प्रतिस्पर्धात्मक छन्। कुवेत र जापान पनि पछिल्लो समय क्रिकेट विकासमा सक्रिय रहेका राष्ट्र हुन्। यस्ता टोलीहरूसँगको खेल नेपालका लागि सजिलो नहुने विश्लेषकहरू बताउँछन्।
नेपाल क्रिकेटका समर्थकहरू, खेलप्रेमी तथा प्रवासी नेपाली समुदायले पनि यसपटकको छनोट चरणलाई निकै उत्साहका साथ हेरिरहेका छन्। नेपाली टिमको प्रदर्शनले नतिजामात्र होइन, अन्तर्राष्ट्रिय क्रिकेटमा नेपालको स्थायित्व र सम्भावना पनि तय गर्नेछ।
