धनुषाको जनकपुरमा शुक्रबार भएको एक यात्रुवाहक बस दुर्घटनामा परी दुई दर्जनभन्दा बढी यात्रु घाइते भएका छन्। दुर्घटना धनुषाधाम नगरपालिका–१ स्थित मल्टोल चोकमा बिहानको समयमा भएको हो।
जनकपुरधामबाट सिराहाको लहानतर्फ जाँदै गरेको ना ५ ख १४४१ नम्बरको बस अनियन्त्रित भई सडकछेउमा पल्टिएको हो। दुर्घटनाका बेला बसमा करिब ३० देखि ३५ यात्रु सवार थिए।
प्रहरी निरीक्षक जटाशंकर यादवका अनुसार, बस मल्टोल चोकमा रहेको बस स्टपमा रोक्ने क्रममा अनियन्त्रित भएर दुर्घटनामा परेको हो। प्रारम्भिक अनुसन्धानका आधारमा प्रहरीको आशंका छ कि बसको ब्रेक फेल भई दुर्घटना भएको हो
दुरर्घटनामा घाइते भएका यात्रुहरूलाई तत्काल उद्धार गरी उपचारका लागि जनकपुरलगायतका विभिन्न अस्पतालहरूमा लगिएको छ। उद्धारका लागि छवटा एम्बुलेन्स र एक प्रहरी भ्यान परिचालन गरिएको थियो।
घाइतेमध्ये केहीको अवस्था गम्भीर रहेको बताइएको छ भने धेरैजसोको अवस्था सामान्य रहेको अस्पताल स्रोतले जनाएको छ। दुर्घटनापछि केही समय त्यस क्षेत्रको सडक अवरुद्ध भएको थियो भने अहिले अवस्था सामान्य भइसकेको जनाइएको छ।
दुर्घटनापछि जनकपुर प्रहरीले घटनास्थलको निरीक्षण गरी आवश्यक विवरण संकलन गरिरहेको छ। बसका चालक र सहचालकको खोजी तथा अनुसन्धानको प्रक्रिया अगाडि बढाइएको छ।
स्थानीय बासिन्दाले सो क्षेत्र नजिकैको सडक मोड झनै जोखिमपूर्ण रहेको भन्दै यात्रुवाहक सवारीसाधनहरूका लागि अतिरिक्त सावधानी अपनाउन आग्रह गरेका छन्।
यसैबीच, प्रहरीले यात्रुवाहक सवारीसाधनहरूको नियमित प्राविधिक जाँच (ब्रेक प्रणाली लगायत) गर्न जरुरी रहेको औंल्याएको छ।
