बलिउडको चर्चित फ्रेन्चाइजी ‘धूम’को चौथो श्रृंखला निर्माणको तयारी तीव्र रुपमा अगाडि बढिरहेको छ। ताजा जानकारी अनुसार, निर्माता आदित्य चोपडाले यस पटक रणवीर कपूरलाई ‘धूम ४’ का लागि मुख्य भूमिकामा फाइनल गर्ने सोच बनाएका छन्।
‘एनिमल’ फिल्मले बक्स अफिसमा राम्रो प्रदर्शन गरेपछि रणवीरको ‘धूम ४’ मा समावेशीकरणले दर्शकहरूमा थप उत्साह थप्ने अनुमान गरिएको छ। यस चलचित्रमा रणवीरले फरक ढंगको ‘ग्रे सेड’ क्यारेक्टरमा अभिनय गर्नेछन्, जसले फ्रेन्चाइजीलाई नयाँ आयाम दिने अपेक्षा गरिएको छ।
रणवीरको आगामी प्रोजेक्टहरू पनि उल्लेखनीय छन्। ‘धूम ४’सँगै, उनी ‘लभ एण्ड वार’, ‘रामायण’को दुई भाग, र ‘एनिमल पार्क’मा प्रमुख भूमिकामा देखिने तयारीमा छन्। यी प्रोजेक्टहरूले रणवीरको करियरलाई थप उचाइमा पुर्याउने विश्वास गरिएको छ।
‘धूम ४’ अहिले प्रि-प्रोडक्सन चरणमा छ। चलचित्रको पटकथा आदित्य चोपडा र विजयकृष्ण आचार्यले मिलेर तयार पारेका छन्। स्रोतहरूका अनुसार, रणवीर र आदित्य चोपडाबीच लामो समयदेखि यो प्रोजेक्टबारे छलफल भइरहेको थियो। कथावस्तु सुनेपछि रणवीरले चलचित्रमा काम गर्ने आफ्नो उत्साह प्रकट गरेका थिए।
यशराज फिल्म्सले ‘धूम ४’ का लागि कास्टिङ प्रक्रियालाई तीव्रता दिइरहेको छ। फिल्मको छायांकन २०२५ को अन्त्यतिर सुरु गरिने योजना रहेको छ। ‘धूम’को ब्रान्डलाई थप उचाइमा लैजान रणवीर उपयुक्त कलाकार भएको आदित्य चोपडाको विश्वास छ।
