दीपेन्द्र लामाको लेखन र निर्देशनमा बनेको फिल्म ‘दुःखी आत्मा’ को फर्स्टलुक पोस्टर सोमबार सार्वजनिक भएको छ। तीन फरक शैलीमा तयार गरिएका पोस्टरहरूले फिल्मका पात्र र कथावस्तुका विविध पक्ष झल्काएका छन्।
पहिलो पोस्टरमा अभिनेता दयाहाङ राईलाई एक्लै प्रस्तुत गरिएको छ, जसले उनको चरित्रको गहनता उजागर गर्छ। दोस्रो पोस्टरमा दयाहाङ र अभिनेत्री आँचल शर्माको प्रेमिल सम्बन्ध देखाइएको छ। तेस्रो पोस्टरमा भने दयाहाङ र आँचलसँगै अनुपविक्रम शाही, बुद्धि तामाङ, रेअर राई, दीया मास्के, पुष्कर गुरूङ, कविता आले, लोकेन्द्र लेखक, र अशान्त शर्मालगायत कलाकारहरूलाई सामूहिक रूपमा प्रस्तुत गरिएको छ।
फिल्मको निर्माण क्लक वर्क क्रिएसनको ब्यानरमा हिमाल कडरियाले गरेका हुन् भने कार्यकारी निर्माताको जिम्मेवारी सुदिप ढकालले लिएका छन्। फिल्मको कथालाई थप गहन बनाउने उद्देश्यले कवि श्रवण मुकारूङका १० कविताहरू पनि समावेश गरिएका छन्।
फिल्मको छायांकन आलोक शुक्लाले गरेका हुन् भने सम्पादन निमेष श्रेष्ठले गरेका छन्। आरआर फिल्मसले वितरण गर्ने फिल्म आगामी फागुन २ गते, भ्यालेन्टाइन डेको अवसरमा प्रदर्शनमा आउनेछ।
पोस्टरहरूले दर्शकमा उत्सुकता जगाउनुका साथै फिल्मप्रतिको अपेक्षा थप बलियो बनाएका छन्। ‘दुःखी आत्मा’ मा दयाहाङ र आँचलको शीर्ष अभिनयसँगै अन्य चर्चित कलाकारहरूको उपस्थिति पनि रहेको छ।
