एडिलेड – दक्षिण अष्ट्रेलियामा बढ्दो घरेलु हिंसा संकटबारे भएको ऐतिहासिक रोयल कमिसनको प्रतिवेदन सार्वजनिक भएपछि राज्य सरकारले तत्काल सुधारात्मक कदम चाल्ने घोषणा गरेको छ।
करिब एक वर्ष लामो छानबिनपछि तयार भएको Domestic, Family and Sexual Violence Royal Commission ले संकट व्यवस्थापनका लागि १३६ वटा सिफारिस अघि सारेको छ।
कमिस्नरNatasha Stott Despojaले भन्नुभयो, “१५ वर्षमाथिका अष्ट्रेलियाली महिलामध्ये एक चौथाइले कुनै न कुनै रूपमा हिंसा भोगेका छन्। दक्षिण अष्ट्रेलियामा यो दर अझै उच्च छ – लगभग तीन महिलामध्ये एक।”
सरकारको प्रारम्भिक कदम
मुख्यमन्त्री Peter Malinauskasले प्रतिवेदन सार्वजनिक भएको दिनमै सात वटा सिफारिस तत्काल लागू गर्ने घोषणा गर्नुभएको छ। यसमा घरेलु, पारिवारिक र यौन हिंसा सम्बन्धी मन्त्रीस्तरीय पोर्टफोलियो र पाँच वर्षे राज्यव्यापी रणनीति निर्माणसमेत समावेश छन्।
Malinauskasले भन्नुभयो, “यी कदमहरूले प्रतिवेदनमा आएका सिफारिसलाई औपचारिक र प्रभावकारी ढंगले कार्यान्वयन गर्न सरकारलाई सक्षम बनाउनेछन्।”
अन्य सिफारिसमाथि छलफल
सरकारले अन्य महत्त्वपूर्ण सिफारिसहरू – जस्तै २४/७ सेवा केन्द्र स्थापना र मदिरा बिक्री–वितरणसम्बन्धी नियम संशोधन – लाई पनि प्राथमिकतामा राख्ने जनाएको छ।
कमिसनले १३ महिनाको अवधिमा हजारौँ व्यक्तिको भनाइ संकलन गरेर प्रतिवेदन तयार गरेको हो। पीडित–बाँचेकाहरूका अनुभवहरू छुट्टै प्रतिवेदनमार्फत प्रस्तुत गरिएको छ। Despojaले भन्नुभयो, “यी कथाहरू अत्यन्तै पीडादायी छन्। केही त जीवनभर मलाई र मेरो टोलीलाई सताइरहनेछन्।”
पृष्ठभूमि
यो छानबिन २०२३ मा सुरु गरिएको थियो, जब एकै साताभित्र चार महिलाको हत्या भएपछि व्यापक आक्रोश फैलिएर राज्यव्यापी माग उठेको थियो।
मुख्यमन्त्री Malinauskasले भन्नुभयो, “यो रोयल कमिसनले पीडितलाई फर्काउन त सक्दैन, तर भविष्यमा यस्ता मृत्यु रोक्न सबैले मिलेर प्रयास गर्ने दृढता यसले देखाएको छ।”
