क्यानबेरा – अष्ट्रेलियाको राजधानी क्यानबेरास्थित नेपाली समुदायका व्यापारीहरू हालै नयाँ शैलीको ठगी को शिकार भएका छन्। २९ जुलाईका दिन दुई नेपाली गहना पसल Om siddha Jeweller Canberra
र Getanjali Jeweller Canberraमा भएको घटनाले नेपाली व्यवसाय समुदायलाई ठूलो धक्का दिएको छ।
चार जनाको समूह (तीन पुरुष र एक महिला) ले “बहिनीको विवाह” भन्दै निमन्त्रणापत्र देखाएर सुरुमा विश्वास जिते, त्यसपछि २४ क्यारेट सुनजस्ता महँगा गहना मागे। भुक्तानी भएको भन्दै फर्जी बैंक ट्रान्ज्याक्सनको स्क्रिनशट देखाइए पनि, अष्ट्रेलियाको बैंक प्रणालीअनुसार रकम तत्काल क्लियर नहुने हुँदा वास्तविकता २४ घण्टापछि मात्र खुल्यो।
घटनाको विवरण
२९ जुलाई – Phillip क्षेत्रमा रहेको एक नेपाली पसल Om siddha Jeweller Canberraबाट करिब ३९००० हजार डलर बराबरको गहना लिइयो। सोही समूहले Belconnen क्षेत्रको अर्को नेपाली पसल Getanjali Jeweller Canberra मा पनि उस्तै शैली अपनाएर १५ हजार डलरभन्दा बढी मूल्यको गहना लिएर हराए।
Phillip का गहना पसलका मालिक अमृत सुनुवारका अनुसार –
“उनीहरूले निकै विश्वासिलो ढंगले कुरा गर्दै ‘बहिनीको विवाहका लागि गहना चाहिएको हो’ भने। स्क्रिनशट देखाएपछि सुरुमा विश्वास लाग्यो तर २४ घण्टाभित्र रकम क्लियर नभएपछि मात्र ठगी भएको पत्ता लाग्यो।”
ठगीको तरिका
– निमन्त्रणापत्र देखाएर भावनात्मक विश्वास दिलाउने।
– फर्जी payment screenshot देखाएर रकम पठाएको जस्तो देखाउने।
– २४ क्यारेट सुन, सबैभन्दा महँगा गहना माग्ने।
– विवाहकै कारण तत्काल चाहिन्छ भन्दै भावनात्मक दबाब सिर्जना गर्ने।
समुदायमा प्रभाव
यी घटनाले क्यानबेरास्थित नेपाली व्यवसाय समुदायलाई ठूलो आघात पुर्याएको छ। दुई पसलबाट मात्र ५५ हजार डलरभन्दा बढी मूल्य बराबरको गहना गायब भएको छ। प्रभावित व्यवसायीहरूले तत्काल प्रहरीमा उजुरी दर्ता गरेका छन्। हाल ACT प्रहरी तथा स्थानीय Casino Police Unit ले घटना अनुसन्धान गरिरहेको छ।
ANFS को वक्तव्य
Australia-Nepal Friendship Society (ANFS) ले यस घटनाप्रति गहिरो चिन्ता व्यक्त गर्दै सार्वजनिक वक्तव्य जारी गरेको छ। वक्तव्यमा भनिएको छ
“नेपाली व्यवसायलाई लक्षित गरी भइरहेको ठगी र चोरी गतिविधिहरू अत्यन्तै दुःखद र चिन्ताजनक छन्। यी घटनाले व्यक्तिलाई मात्र नभई समुदायकै जीविकोपार्जन, प्रतिष्ठा र विश्वासमाथि आक्रमण गरेका छन्।”
ANFS ले अष्ट्रेलियन संघीय र राज्य सरकार, सांसदहरू, प्रहरी र सरोकारवालालाई तत्काल छानबिन गरी दोषीलाई कानुनी दायरामा ल्याउन आग्रह गरेको छ। साथै, समुदायलाई सचेत रहन र ठूलो मूल्यको कारोबार गर्दा रकम बैंकमा cleared भएको पक्का गरेपछि मात्र सामान दिन आग्रह गरेको छ।
ANFS का पहलहरू
समुदायलाई लक्षित हुने ठगी घटनाबारे सार्वजनिक सचेतना बढाउने।
साना व्यवसाय विशेष गरी प्रवासी र अल्पसंख्यक समुदायको व्यवसायको सुरक्षा सुनिश्चित गर्न प्रहरीलाई आग्रह गर्ने।
वित्तीय प्रणालीमा पारदर्शिता र कडाइ ल्याउन वकालत गर्ने।
समुदायमा एकता र सतर्कता बढाउने।
सन्देश र सचेतना
केवल payment screenshot मा भर नपर्नुहोस्।
रकम बैंकमा आधिकारिक रूपमा cleared भएको पुष्टि भएपछि मात्र सामान हस्तान्तरण गर्नुहोस्।
ठूला मूल्यका कारोबारमा विशेष सतर्कता अपनाउनुहोस्।
क्यानबेरामा भएको यस घटनाले नेपाली समुदायमा विश्वास र सुरक्षाबारे गम्भीर प्रश्न उठाएको छ। व्यवसायीहरूले तत्काल कारबाहीको अपेक्षा गरेका छन् भने समुदायले पनि एकताबद्ध भएर ठगीविरुद्ध सचेत रहने प्रतिज्ञा गरेको छ।
प्रहरी प्रशासनले दोषीलाई चाँडै पक्राउ गरी कानुनी कारबाही गर्ने विश्वास दिलाएको छ।
