सिड्नी, जुलाई १० —गैर आवासीय नेपाली संघ (एनआरएनए) को अन्तर्राष्ट्रिय समन्वय परिषद (आईसीसी) ले अष्ट्रेलियाको राष्ट्रिय समन्वय परिषद (एनसीसी) अन्तर्गतको अधिवेशन प्रक्रिया विवादास्पद रूपमा अघि बढाइएको भन्दै असन्तुष्टि जनाउँदै ‘सदस्यता वितरण तथा एकता अधिवेशन समिति’ गठन गरेको छ। समितिको संयोजकमा विवेक थापा नियुक्त भएका छन्।
आईसीसीका अनुसार, पटक–पटक निर्देशन र सुझाव दिँदा पनि एनसीसी अष्ट्रेलियाले संस्थागत प्रक्रियालाई बेवास्ता गर्दै अधिवेशनको तयारी एकपक्षीय रूपमा अघि बढाएको हो। त्यसैको प्रतिक्रियामा नयाँ समिति गठन गरिएको विज्ञप्तिमा उल्लेख छ।
विवेक थापाको संयोजकत्वमा गठित समितिले अष्ट्रेलियास्थित विभिन्न संघसंस्था, समुदायका प्रतिनिधिहरू, तथा आम एनआरएन नागरिकहरूसँग व्यापक छलफल गर्दै सदस्यता वितरण, निर्वाचन, र अधिवेशनसम्बन्धी सम्पूर्ण प्रक्रिया अघि बढाउने बताइएको छ। समितिमा एनआरएनएका वर्तमान तथा पूर्व पदाधिकारी, ओसिनिया क्षेत्रका संयोजकहरू र समुदायका अन्य जिम्मेवार व्यक्तिहरूको समेत समावेश गरिनेछ।
प्रेस विज्ञप्तिमा उल्लेख भएअनुसार एनआरएनए-एनसीसी अष्ट्रेलियाका पदाधिकारीहरूकै तर्फबाट संस्थाभित्र “ब्यापक आर्थिक अनियमितता र बेथिति” का गम्भीर आरोप सार्वजनिक रूपमा उठाइएका छन्। सदस्यता वितरण र नवीकरण प्रक्रियामा एकाधिकार कायम गरिएको र आईसीसीको निर्देशनसमेत बेवास्ता गरिएको जनाइएको छ।
यसका साथै, संस्थाभित्र अघिल्ला वर्षहरूमा कायम रहेको समावेशी निर्णय प्रक्रिया, व्यापक छलफल, र सहमतिको संस्कारलाई पनि लत्याइएको आरोप विज्ञप्तिमा उल्लेख छ। विवेक थापाले नेतृत्व गरेको समितिले समावेशी र सर्वपक्षीय सहभागितामा आधारित ‘एकता अधिवेशन’ सम्पन्न गर्ने प्रतिबद्धता जनाएको छ। विज्ञप्तिमा भनिएको छ, “एनआरएनए अष्ट्रेलियालाई सबै गैर-आवासीय नेपालीहरूको साझा आवाज बनाउने उद्देश्यसहित एकताबद्ध र पारदर्शी संगठनको रूपमा अगाडि बढाइनेछ।”
